ചിത്രവിശേഷത്തിന് ഒരു വയസ്

നവംബര്‍ 20, 2007: ‘ചിത്രവിശേഷം’ എന്ന ബ്ലോഗ് ഇന്ന് ഒരു വര്‍ഷം പിന്നിടുന്നു‍. ‘യേസ് യുവര്‍ ഓണര്‍’ എന്ന ചിത്രത്തിന്റെ വിശേഷങ്ങള്‍ പങ്കുവെച്ചുകൊണ്ട് 2006 നവംബര്‍ ഇരുപതിനാണ് ഇതിലെ ആദ്യ പോസ്റ്റ് പിറക്കുന്നത്. ഇങ്ങിനെയൊരു ബ്ലൊഗ് തുടങ്ങുമ്പോള്‍; തുടര്‍ച്ചയായി ഇത്രയും പോസ്റ്റുകള്‍ എഴുതുവാന്‍ കഴിയുമെന്നോ, അതൊക്കെ വായിക്കപ്പെടുമെന്നോ, ഇത്രയും പ്രതികരണങ്ങള്‍ ലഭിക്കുമെന്നോ സ്വപ്നത്തില്‍ പോലും ഞാന്‍ കരുതിയിരുന്നില്ല. ‘ചിത്രവിശേഷ’ത്തെ ഇത്രയുമൊക്കെ ആക്കിത്തീര്‍ക്കുവാന്‍ സഹകരിച്ച എല്ലാ വായനക്കാരോടുമുള്ള നന്ദി രേഖപ്പെടുത്തുവാനും, സന്തോഷം പങ്കുവെയ്ക്കുവാനും ഈ അവസരം ഞാന്‍ ഉപയോഗിക്കുന്നു.

അല്പം ചരിത്രം
ഓര്‍ക്കുട്ടിലെ തനിമലയാളിക്കൂട്ടമായ ‘മലയാളം’ കമ്മ്യൂണിറ്റിയില്‍ പുതിയ സിനിമകളെക്കുറിച്ച് വല്ലപ്പോഴുമൊക്കെ ഞാന്‍ എഴുതുമായിരുന്നു. ബ്ലോഗുകളേയും യൂണിക്കോഡിനേയും ഞാനന്ന് പരിചയപ്പെട്ടിരുന്നില്ല. ബ്ലോഗിലെത്തിയ മറ്റു പലരേയും പോലെ കൊടകരപുരാണമായിരുന്നു എന്റെയും ആദ്യത്തെ ബ്ലോഗ് വായനാനുഭവം. തുടര്‍ന്ന് കുറുമാന്റെ കഥകളും, ഉദയസൂര്യന്റെ നാട്ടിലും, എന്റെ നാലുകെട്ടും തോണിയും, സൂര്യഗായത്രിയുമൊക്കെ പരിചിതമായി. പക്ഷെ, സമകാലീന മലയാള സിനിമകളെക്കുറിച്ചുള്ള ബ്ലോഗുകള്‍ തിരഞ്ഞപ്പോള്‍ അത്തരത്തിലൊന്ന് എവിടെയും കണ്ടില്ല. എങ്കില്‍ പിന്നെ, "എനിക്കു തന്നെ അങ്ങിനെയൊന്ന് എന്തുകൊണ്ട് തുടങ്ങിക്കൂട?" എന്ന ചിന്തയുടെ പരിണിതഫലമാണ് ഈ ബ്ലോഗ്. ഒരു വര്‍ഷം പിന്നിടുമ്പോള്‍, ഇവിടെ അറുപത്തിയഞ്ചോളം ചിത്രങ്ങളുടെ വിശേഷങ്ങളും, വിവിധ വിഷയങ്ങളിലായി അഞ്ച് ലേഖനങ്ങളും ചേര്‍ക്കപ്പെട്ടു കഴിഞ്ഞു.

എന്താണ് ചിത്രവിശേഷം?
പലരും പലപ്പോഴായി ചോദിച്ചിട്ടുള്ള ഒരു ചോദ്യമാണിത്, ചിത്രവിശേഷം കൊണ്ട് ഞാനെന്താണ് ഉദ്ദേശിക്കുന്നതെന്ന്. ഒരു സിനിമയെക്കുറിച്ചുള്ള ആധികാരികമായ നിരൂപണമോ പഠനമോ എന്റെ ലക്ഷ്യമല്ല. ഓരോ സിനിമകളും കാണുമ്പോള്‍ പ്രേക്ഷകനെന്ന നിലയില്‍ എനിക്കു തോന്നുന്ന കാര്യങ്ങള്‍ പങ്കുവെയ്ക്കുവാനൊരിടം, അത്രയുമേ ഇതുകൊണ്ട് ഉദ്ദേശിക്കുന്നുള്ളൂ. സിനിമ കാണുവാന്‍ ആഗ്രഹിക്കുന്നവര്‍ക്ക് ഒരുപക്ഷെ ഒരു സഹായമായിത്തീ‍രുമെന്ന വിചാരത്തിലാണ് ഇങ്ങിനെയൊന്ന് തുടങ്ങിവെച്ചത്. പിന്നീട് പലരുടേയും കമന്റുകളില്‍ നിന്നും, ഈ ലക്ഷ്യം ചിത്രവിശേഷം ഒരു പരിധിവരെ സാധിച്ചെടുത്തു എന്നാണ് എനിക്കു മനസിലാവുന്നത്. അതിലെനിക്ക് അതിയായ സന്തോഷമുണ്ട്.

ചിത്രവിശേഷത്തിലെ റേറ്റിംഗ്
പലപ്പോഴും തര്‍ക്കവിഷയമായിട്ടുള്ള ഒന്നാണിത്, പ്രത്യേകിച്ചും ‘ഛോട്ടാ മുംബൈ’ എന്ന ചിത്രം പുറത്തിറങ്ങിയപ്പോള്‍. റേറ്റിംഗ് നല്‍കുക എന്നത് വളരെ ആയാസകരമായ ഒന്നായിട്ടാണ് എനിക്കു തോന്നിയിട്ടുള്ളത്. ഇതുവരെ നല്‍കിയിട്ടുള്ള എല്ലാ റേറ്റിംഗും പരിശോധിച്ച്, അവയുമായി തട്ടിച്ചു നോക്കി, ഓരോ പുതിയ സിനിമയ്ക്കും റേറ്റിംഗ് നല്‍കുക എന്നത് പ്രായോഗികമല്ലല്ലോ! അതുകൊണ്ടുതന്നെ, പൂര്‍ണ്ണമായും കുറ്റമറ്റ റേറ്റിംഗാണ് ചിത്രവിശേഷത്തിലേതെന്ന് ഞാന്‍ അവകാശപ്പെടുന്നില്ല. സിനിമയുടെ കുറ്റങ്ങളും കുറവുകളും മേന്മകളും കാര്യകാരണസഹിതം എടുത്തെഴുതുവാന്‍ കഴിയും. എന്നാല്‍ റേറ്റിംഗിന് അങ്ങിനെയൊരു വിശദീകരണം നല്‍കുവാന്‍ കഴിയണമെന്നില്ലല്ലോ? അതിനാല്‍ തന്നെ ചിത്രത്തെക്കുറിച്ച് എന്തെഴുതിയിരിക്കുന്നു എന്നതിന്, റേറ്റിംഗിനേക്കാള്‍ പ്രാധാന്യമുണ്ട് എന്നാണ് ഞാന്‍ കരുതുന്നത്.

അഭിപ്രായങ്ങളും നിര്‍ദ്ദേശങ്ങളും
ചിത്രവിശേഷത്തെക്കുറിച്ച് നിങ്ങള്‍ക്കുള്ള അഭിപ്രായങ്ങളും, ഈ ബ്ലോഗ് കൂടുതല്‍ മെച്ചപ്പെടുത്തുവാനുള്ള നിര്‍ദ്ദേശങ്ങളും കമന്റുകളായി രേഖപ്പെടുത്തുവാന്‍ താത്പര്യപ്പെടുന്നു. ചിത്രവിശേഷം ഇതുവരെ വായിച്ച് പ്രോത്സാഹനങ്ങള്‍ തന്ന എല്ലാ വായനക്കാര്‍ക്കും ഒരിക്കല്‍ കൂടി നന്ദിരേഖപ്പെടുത്തിക്കൊണ്ട് ഒന്നാം വാര്‍ഷിക പോസ്റ്റ് അവസാനിപ്പിക്കട്ടെ.

Post a Comment

Keywords: Chithravishesham, Chitravishesham, Haree, Hari, Hareesh, First Year, Birth Day, One Year, Age
--