നീലത്താമര (Neelathamara)

യൂസഫ് അലി കേച്ചേരിയുടെ സംവിധാനത്തില്‍ 1979-ല്‍ പുറത്തിറങ്ങിയ ‘നീലത്താമര’ എന്ന മലയാള ചലച്ചിത്രത്തിന്റെ പുനരാവിഷ്കാരമാണ് എം.ടി. വാസുദേവന്‍ നായരുടെ രചനയില്‍ ലാല്‍ ജോസ് സംവിധാനം നിര്‍വ്വഹിച്ച് പുറത്തിറങ്ങിയിരിക്കുന്ന 2009-ലെ ‘നീലത്താമര’. രേവതി കലാമന്ദിറിന്റെ ബാനറില്‍ സുരേഷ് കുമാറാണ് ചിത്രം നിര്‍മ്മിച്ചിരിക്കുന്നത്. കേന്ദ്രകഥാപാത്രങ്ങളുള്‍പ്പടെ ചിത്രത്തിലെ ഭൂരിഭാഗം കഥാപാത്രങ്ങളും പുതുമുഖങ്ങളാണ്. അര്‍ച്ചന കവി, കൈലാഷ്, സംവൃത സുനില്‍ തുടങ്ങിയവരാണ് പ്രധാനവേഷങ്ങളില്‍. പഴയ ‘നീലത്താമര’യേക്കാള്‍ പല കാരണങ്ങള്‍ക്കൊണ്ടും മികച്ചതെന്നു തന്നെ കരുതാവുന്ന ഒന്നാണ് പുതുമോടിയിലെത്തുന്ന ഈ കാലഘട്ടത്തിലെ ‘നീലത്താമര’; കഥ പറയുന്ന കാലം മനസിലാക്കി അല്പം വിട്ടുവീഴ്ചകള്‍ക്ക് പ്രേക്ഷകരും തയ്യാറായിരിക്കണമെന്നു മാത്രം.

5.0
6.5
7.0
3.0
4.0

6.38

പഴയ ‘നീലത്താമര’യിലെ കഥാപാത്രങ്ങള്‍ക്ക് മുപ്പതു വര്‍ഷങ്ങള്‍ക്കിപ്പുറം എന്തു സംഭവിച്ചിരിക്കാം എന്നു ചിന്തിച്ചുകൊണ്ടാണ് കഥാകാരന്‍ പുതിയ ‘നീലത്താമര’ പറഞ്ഞു തുടങ്ങുന്നത്. പിന്നീട് പണ്ടു നടന്ന കാര്യങ്ങളുടെ ഓര്‍മ്മപ്പെടുത്തലായി യഥാര്‍ത്ഥ കഥ വികസിക്കുന്നു. പൈങ്കിളി സ്വഭാവമുള്ള കഥാപാത്രങ്ങള്‍ക്ക്, അതിനപ്പുറം ഒരു വ്യക്തിത്വം ചമയ്ക്കുവാന്‍ എം.ടി. വാസുദേവന്‍ നായര്‍ക്കു കഴിഞ്ഞു. ആദ്യ സിനിമയിലുള്ള അനാവശ്യ തന്തുക്കള്‍ ഒഴിവാക്കിയതിലും പ്രതിനായക കഥാപാത്രത്തിന് അധികം ഇടം നല്‍കാതെ സ്വാഭാവികമായി കഥ പറഞ്ഞതിലും രചയിതാവ് അഭിനന്ദനമര്‍ഹിക്കുന്നു. കുഞ്ഞിമാളു കൂട്ടുകാരിയായ അമ്മിണിയോട് അര്‍ത്ഥമന്വേഷിക്കുന്ന safe, sweet തുടങ്ങിയ ഇംഗ്ലീഷ് വാക്കുകളില്‍ കാര്യമൊളിപ്പിക്കുന്ന എം.ടി.യുടെ രചനാപാടവം ചിത്രത്തിന് മറ്റൊരു തലം സമ്മാനിക്കുന്നുണ്ട്. സംഭാഷണങ്ങളിലും ഈ മികവ് ദൃശ്യമാണ്. എന്നാല്‍ കഥ തീരുമ്പോള്‍ സിനിമ കാര്യമായൊന്നും അവശേഷിപ്പിക്കുന്നില്ല എന്നയിടത്ത് രചയിതാവ് പരാജയപ്പെടുകയും ചെയ്യുന്നു.

വിപണനസാധ്യതകള്‍ ഒഴിച്ചു നിര്‍ത്തിയാല്‍ കലാപരമായോ ആശയപരമായോ രണ്ടാം വട്ടം പറയേണ്ടുന്ന ഒന്നും തന്നെ ‘നീലത്താമര’യിലില്ല. എം.ടി. വാസുദേവന്‍ നായരെപ്പോലെയൊരു രചയിതാവിനും ഇത്തരമൊരു പ്രമേയത്തില്‍ കാര്യമായൊന്നും ചെയ്യുവാനില്ല. ലാല്‍ ജോസിന്റെ സംവിധാനമികവ് ചിത്രത്തെ തീര്‍ച്ചയായും ഒരുവട്ടം കാണാവുന്ന ഒന്നാക്കി മാറ്റിയിട്ടുണ്ട് എന്നതു മറക്കുന്നില്ല. അനാവശ്യമായി വലിച്ചു നീട്ടാതെ, രണ്ടു മണിക്കൂറില്‍ കഥപറഞ്ഞു തീര്‍ക്കുവാനും സംവിധായകനായി. മനോഹരമായ ദൃശ്യങ്ങളുടെ പൊലിമയും സിനിമയുടെ മികവുയര്‍ത്തുന്നു. വിജയ് ഉലഗനാഥിന്റെ ക്യാമറയും രഞ്ജന്‍ എബ്രഹാമിന്റെ ചിത്രസന്നിവേശവും ഇവിടെ പ്രത്യേകം പരാമര്‍ശമര്‍ഹിക്കുന്നു. തുടക്കത്തിലുള്ള ടൈറ്റിലുകളും രസകരമായി തോന്നി. കലാസംവിധാനം നിര്‍വ്വഹിച്ച ഗോകുല്‍ ദാസിന്റെ മികവില്‍, മുപ്പതു വര്‍ഷം മുന്‍പുള്ള കഥ പറയുന്ന ഭാഗങ്ങളില്‍ ഒറ്റ നോട്ടത്തില്‍ തന്നെ കണ്ണില്‍ തടയുന്ന പ്രശ്നങ്ങളധികമൊന്നും കാണുവാന്‍ കഴിഞ്ഞില്ല. കുക്കു പരമേശ്വരന്റെ വേഷവിധാനങ്ങളും ശിവാജി ഗുരുവായൂരിന്റെ മേക്ക്-അപ്പും കഥാപാത്രങ്ങളെ നന്നായി തുണച്ചിട്ടുമുണ്ട്. കുഞ്ഞിമാളുവിന്റെ മുപ്പതുവര്‍ഷം മുന്‍പുള്ള ഫോട്ടോകളുടെ വലുപ്പം, വിവാഹവേളയില്‍ സംവൃത അവതരിപ്പിക്കുന്ന രത്നം അണിയുന്ന ആഭരണങ്ങള്‍ തുടങ്ങിയ ചില കല്ലുകടികള്‍ അവിടെയുമിവിടെയും ഉണ്ടായിരുന്നു എന്നതും പറയാതിരിക്കുവാനാവില്ല.

ശ്രെയ ഗോശാല്‍, വി. ശ്രീകുമാര്‍ തുടങ്ങിയവര്‍ ആലപിച്ചിരിക്കുന്ന “അനുരാഗവിലോചനനായി അതിലേറെ മോഹിതനായി...” എന്ന ഗാനം ഇതിനോടകം തന്നെ പ്രേക്ഷകര്‍ക്ക് പ്രിയപ്പെട്ടതായിട്ടുണ്ട്. കഥയോട് ചേര്‍ന്നു പോവുന്ന രീതിയിലാണ് ഗാനരംഗങ്ങളും വിഭാവനം ചെയ്തിരിക്കുന്നത് എന്നതിനാല്‍ ഈ ഗാനം ചിത്രത്തോട് നന്നായിണങ്ങുന്നു. രണ്ട് കീര്‍ത്തനങ്ങളുടെ ആവര്‍ത്തനമാണെങ്കിലും, രാത്രിയില്‍ പാട്ടുപാടുന്ന ഭാഗവതരെ സൂചിപ്പിക്കുന്ന സംഗീതശകലങ്ങളും ആകര്‍ഷകമാണ്. “നീലത്താമരേ പുണ്യം ചൂടിയെന്‍...” എന്ന ടൈറ്റില്‍ ഗാനം, “പകലൊന്നുമാഞ്ഞ വീഥിയിലെ...” എന്നീ ഗാനങ്ങളും ശരാശരി നിലവാരം പുലര്‍ത്തുന്നുണ്ട്. വയലാര്‍ ശരത്ചന്ദ്രവര്‍മ്മയുടെ വരികളും വിദ്യാസാഗറിന്റെ സംഗീതവും ഈ ഗാനങ്ങളിലൂടെ ഒരിക്കല്‍ കൂടി നമുക്ക് പഴയഗാനങ്ങളുടെയൊരു മധുരം പകരുന്നു. ഗാനങ്ങളുടെ സംഗീതം മനോഹരമായെങ്കില്‍, മറ്റിടങ്ങളിലുപയോഗിച്ചിരിക്കുന്ന ശബ്ദശകലങ്ങള്‍ക്ക് അത്രത്തോളം മികവ് പറയുവാനില്ല. പലയിടത്തും വളരെ ഉയര്‍ന്നു കേള്‍ക്കുന്ന ശബ്ദങ്ങള്‍ വല്ലാതെ അലോസരപ്പെടുത്തുകയും ചെയ്യുന്നു.

തലയിണയില്‍ മുഖം പൊത്തി കരയുന്ന കുഞ്ഞിമാളു എഴുനേല്‍ക്കുമ്പോള്‍ കണ്ണുനീരില്‍ കുതിര്‍ന്ന തലവണയെന്ന പോലെ സൂക്ഷ്മാംശങ്ങളിലുള്‍പ്പടെ ശ്രദ്ധ നല്‍കുവാന്‍ ലാല്‍ ജോസ് ശ്രമിച്ചിട്ടുണ്ട്. അഭിനേതാക്കളൊക്കെയും പുതുമുഖങ്ങളാണെങ്കില്‍ തന്നെയും അവരെ വേണ്ടും വണ്ണം ഉപയോഗിക്കുന്നതില്‍ സംവിധായകന്‍ വിജയിച്ചിരിക്കുന്നു. സ്ത്രീ കഥാപാത്രങ്ങള്‍ കേന്ദ്രസ്ഥാനത്തു നില്‍ക്കുന്ന വാണിജ്യസിനിമകള്‍ മലയാളത്തില്‍ ഇന്ന് അപൂര്‍വ്വതയാണ്. അത്തരത്തിലൊന്ന് പുറത്തിറക്കുവാന്‍ സംവിധായകന്‍ കാട്ടിയ ആര്‍ജവത്തേയും അഭിനന്ദിക്കേണ്ടതുണ്ട്. കുഞ്ഞിമാളുവായെത്തുന്ന അര്‍ച്ചന കവിയുടെ അഭിനയം മികവു പുലര്‍ത്തുന്നു. സ്വപ്നങ്ങളും ആശങ്കകളും പ്രതീക്ഷകളുമുള്ള ഒരു പെണ്‍കുട്ടി; എന്നാല്‍ തിരിച്ചടികളില്‍ മനസു പതറാതെ നില്‍ക്കുന്ന കുഞ്ഞിമാളുവിനെ അര്‍ച്ചന നന്നായി ഉള്‍ക്കൊണ്ടു തന്നെ അവതരിപ്പിച്ചിട്ടുണ്ട്. മാളുവമ്മയായി ശ്രീദേവി ഉണ്ണി, ഹരിദാസായി കൈലേഷ്, രത്നമായി സംവൃത സുനില്‍, അപ്പുക്കുട്ടനായി സുരേഷ് തുടങ്ങിയവരും മോശമായില്ല. അമ്മിണിയായെത്തുന്ന റീമ കല്ലിങ്കല്‍, കുഞ്ഞിമാളുവിന്റെയും രത്നത്തിന്റെയും മുതിര്‍ന്ന കാലത്തെ അവതരിപ്പിച്ചവര്‍ തുടങ്ങിയവര്‍ക്കൊക്കെ തങ്ങളുടെ കഥാപാത്രത്തെ ഇതിലും മികച്ചതാക്കാമായിരുന്നു.

കഥയുടെ ഒരുഭാഗം നോക്കിയാല്‍; ആഗ്രഹിച്ച പെണ്ണിനെ അനുഭവിക്കുകയും ഇഷ്ടപ്പെട്ട പെണ്ണിനെ വരിക്കുകയും ചെയ്ത് വിജയിച്ചു നില്‍ക്കുന്ന നായകന്‍, തന്റെ ശരീരത്തോടുള്ള നായകന്റെ കാമം പ്രണയമെന്നു ധരിച്ച് ഇംഗിതത്തിനു വഴങ്ങി വഞ്ചിക്കപ്പെടുന്ന നായിക. എന്നാല്‍ മുപ്പതു വര്‍ഷങ്ങള്‍ക്കിപ്പുറം; സമാധാനമില്ലാത്ത ഒരു കുടുംബ ജീവിതം അനുഭവിച്ച് അകാലത്തില്‍ മരണപ്പെട്ട നായകന്‍, മുറച്ചെറുക്കനുമൊത്ത് മൂന്നു കുട്ടികളുടെ അമ്മയുമായി സന്തോഷത്തോടെ കഴിയുന്ന നായിക. നായകന്‍ വിവാഹം കഴിക്കുന്ന പെണ്‍‌കുട്ടിയാവട്ടെ ‘നല്ല’ ഒരു മനുഷ്യനെ രണ്ടാമതു വിവാഹം കഴിച്ച് സുഖമായി കഴിയുകയും ചെയ്യുന്നു! ഭാര്യാഭര്‍ത്താക്കന്മാര്‍ക്കിടല്‍ ഉണ്ടായിരുന്ന അകല്‍ച മനസിലാക്കിക്കുവാനായി ഹരിദാസ്-രത്നം ദമ്പതികളുടെ ഒരു മകളും സിനിമയിലുണ്ട്. ഒരുപക്ഷെ, രത്നത്തിന്റെ പെരുമാറ്റങ്ങളുടെ പൊരുള്‍ മകള്‍ക്കറിയുകയില്ല, അത് ആരോടും രത്നം പറഞ്ഞിട്ടുമില്ല. ഇങ്ങനെ ചില കഥാപാത്രങ്ങളിലൂടെ, സംഭാഷണങ്ങളിലൂടെ രചയിതാവും സംവിധായകനും പറയാതെ പറയുന്ന കുറച്ചു കാര്യങ്ങളും ചിത്രത്തിലുണ്ട്. അവയൊക്കെക്കൂടി ഓര്‍ത്തെടുത്ത് മനസിലാക്കുവാനായാല്‍ ഒന്നു കണ്ടിരിക്കുന്നതില്‍ തെറ്റില്ലാത്ത ഒരു ചിത്രമായി, പുതുതായി വിരിഞ്ഞ ഈ ‘നീലത്താമര’യെ കണക്കാക്കാം.

Description: Neelathamara - A Malayalam (Malluwood) film directed by Lal Jose; Starring ; Produced by Suresh Kumar; Story, Screenplay and Dialogues by M.T. Vasudevan Nair; Camera (Cinematography) by Vijay Ulaganath; Editing by Ranjan Abraham; Art Direction by Gokul Das; Stunts (Action) by ; Background Score by Vidyasagar; Sound Effects by ; DTS Mixing by ; Titles by ; Make-up by Sreejith Guruvayoor; Costumes by Kuku Parameswaran; Lyrics by Vayalar Sharath Chandra Varma; Music by Vidyasagar; Choreography by ; Audio Recording by ; Film Review in Malayalam by Hareesh N. Nampoothiri aka Haree | ഹരീ for Chithravishesham (Chitravishesham) Blog. Nov 27 2009 Release.

--