വിണ്ണൈത്താണ്ടി വരുവായാ (Vinnaithaandi Varuvaayaa)

രണ്ടായിരത്തിയെട്ടില മികച്ച തമിഴ് ചിത്രത്തിനുള്ള കേന്ദ്രസര്‍ക്കാരിന്റെ ബഹുമതി കരസ്ഥമാക്കുകയും, ഒപ്പം തന്നെ വാണിജ്യപരമായി വിജയം കൊയ്യുകയും ചെയ്ത ‘വാരണം ആയിരം’ എന്ന ചിത്രത്തിനു ശേഷം ഗൗതം വാസുദേവ് മേനോന്റെ സംവിധാനത്തില്‍ പുറത്തിറങ്ങുന്ന ചിത്രമാണ് ‘വിണ്ണൈത്താണ്ടി വരുവായാ’. സംവിധായകന്‍ തന്നെ ചിത്രത്തിന്റെ രചനയും നിര്‍വ്വഹിച്ചിരിക്കുന്നു. സിലമ്പരശനും തൃഷ കൃഷ്ണനുമാണ് ചിത്രത്തിലെ കേന്ദ്ര കഥാപാത്രങ്ങളായ കാര്‍ത്തിക്കിനേയും ജെസിയേയും അവതരിപ്പിക്കുന്നത്. മദന്‍, ഗണേഷ്, എല്‍‌റെഡ് കുമാര്‍, ജയരാമന്‍ എന്നിവര്‍ ചേര്‍ന്നു നിര്‍മ്മിച്ചിരിക്കുന്ന ചിത്രം റെഡ് ജയന്റ് മൂവീസ് പ്രദര്‍ശനത്തിനെത്തിച്ചിരിക്കുന്നു. ജനപ്രിയ ചേരുവകള്‍ ഒഴിവാക്കാതെ, കലാമൂല്യമുള്ള വാണിജ്യചിത്രങ്ങളൊരുക്കുന്ന ഗൗതം മേനോന്‍ ശൈലിയില്‍ തന്നെയാണ് ഈ പ്രണയചിത്രവും.

ആകെത്തുക     : 6.00 / 10

കഥയും കഥാപാത്രങ്ങളും
സംവിധാനം
അഭിനയം
സാങ്കേതികം
പാട്ട് / നൃത്തം / ആക്ഷന്‍

: 6.00 / 10
: 5.00 / 10
: 7.50 / 10
: 2.50 / 05
: 3.00 / 05

കാര്‍ത്തിക്കായും ജെസിയായുമെത്തുന്ന സിലമ്പരശന്റേയും തൃഷ കൃഷ്ണന്റെയും അഭിനയമികവാണ് ചിത്രത്തില്‍ എടുത്തു പറയേണ്ടതായുള്ളത്. ചിത്രത്തിന്റെ ഏകദേശം തൊണ്ണൂറു ശതമാനവും ഇവരെതന്നെയാണ് പ്രേക്ഷകര്‍ കണ്ടുകൊണ്ടിരിക്കുന്നത്. എന്നിരുന്നാലും ഒട്ടും മടുപ്പു തോന്നാത്ത വിധം കഥാപാത്രങ്ങളെ മികച്ചതാക്കുവാന്‍ ഇരുവര്‍ക്കുമായി. കാര്‍ത്തിക്കും ജസിയും തമ്മിലുള്ള പ്രണയത്തിന്റെ രസതന്ത്രം കാണികള്‍ക്ക് അനുഭവവേദ്യമാക്കുവാന്‍ കഴിഞ്ഞു എന്നയിടത്താണ് ഇരുവരും വിജയിക്കുന്നത്. ഇവര്‍ മികച്ചതായി എന്നു പറയുമ്പോള്‍ തന്നെ, ചിത്രത്തിലെ മറ്റ് അഭിനേതാക്കളുടെ പ്രകടനം ശരാശരിയിലും താഴെയായി എന്നതും കാണേണ്ടതുണ്ട്. കാര്‍ത്തിക്കിന്റെ സുഹൃത്തായെത്തുന്ന ഗണേഷ്, ജെസിയുടെ പിതാവായെത്തുന്ന ബാബു ആന്റണി, മറ്റു ചെറുവേഷങ്ങളിലെത്തുന്ന അഭിനേതാക്കള്‍; ഏവരും അഭിനയത്തിന്റെ കാര്യത്തില്‍ പിന്നില്‍ തന്നെ. അഭിനേതാക്കളെ കഥാപാത്രങ്ങളായി ഒരുക്കിയെടുക്കുന്നതില്‍ സംവിധായകന്‍ എന്ന നിലയില്‍ സ്ഥിരത പുലര്‍ത്തുവാന്‍ ഗൗതം മേനോന് ചിത്രത്തില്‍ സാധിച്ചില്ല. അതിനാല്‍ തന്നെ പ്രാധാന്യമര്‍ഹിക്കുന്ന ചില രംഗങ്ങളെങ്കിലും പരിഹാസ്യമായി മാറുകയും ചെയ്തു.

Cast & Crew
Vinnaithaandi Varuvaayaa

Directed by
Gautham Vasudev Menon

Produced by
Madan, Ganesh, Elred Kumar, Jayaraman

Story, Screenplay, Dialogues
Gautham Vasudev Menon

Starring
Silambarasan, Trisha Krishnan, Ganesh, Kitty, Babu Antony, Uma Padmanaban, Samantha Ruth Prabhu, Naga Chaitanya, K.S. Ravikumar, Janani Iyer

Cinematography (Camera)
Manoj Paramahamsa

Editing by
Anthony

Art Direction by
Rajeevan

Music by
A.R. Rahman

Lyrics by
Thamarai / Kaithapram Damodaran Namboothiri

Make-Up by
Rajeevan

Costumes by
Nalini Sriram

Choreography by
Flexi Stu

Stunts by
Silva

തട്ടും തടവുമില്ലാതെ സുഗമമായി പറഞ്ഞു പോവുന്നവയായിരുന്നു ഗൗതം മേനോന്റെ മുന്‍ ചിത്രങ്ങളെങ്കില്‍, അത്രത്തോളം മികവ് കഥാകഥനത്തില്‍ കൈവരിക്കുവാന്‍ ഇതില്‍ സംവിധായകനു കഴിഞ്ഞില്ല. അതിനാല്‍ തന്നെ മുന്‍ ചിത്രങ്ങളെ അപേക്ഷിച്ച് അസ്വാദ്യകരമായ ഒരു അനുഭവമായി മാറുവാന്‍ ‘വിണ്ണൈത്താണ്ടി വരുവായ്ക്ക്’ കഴിയുന്നില്ല. ഇടവേളവരെയുള്ള ചിത്രത്തിന്റെ മെല്ലെപ്പോക്കും കാണികളെ അലോസരപ്പെടുത്തുന്നതാണ്. സിമ്പുവിലും തൃഷയിലും കഥ ഒതുക്കി നിര്‍ത്തിയതും ശരിയായ തീരുമാനമായില്ല. ഇരുവരും വിദേശത്ത് അവിചാരിതമായി കണ്ടെത്തുന്നതു മുതല്‍ക്കെങ്കിലും കാര്‍ത്തിക്ക് സംവിധാനം ചെയ്യുന്ന ചിത്രത്തിലെ നായകനിലും നായികയിലുമൂടെ ചിത്രം മുന്നോട്ടു കൊണ്ടുപോകാമായിരുന്നു. അവരെ ചെറുവേഷങ്ങളാക്കി ഒതുക്കാതെ പ്രധാന്യമുള്ള കഥാപാത്രങ്ങളായി മാറ്റുവാനും സാധിക്കുമായിരുന്നു. അങ്ങിനെയല്ലാത്തതിനാല്‍ തന്നെ, ചിത്രത്തിനുള്ളിലെ ചിത്രത്തിലെ നായകനും നായികയും പ്രതിനിധീകരിക്കുന്നത് കാര്‍ത്തിക്കിനെയും ജെസിയെയുമാണെങ്കിലും, അത് പ്രേക്ഷകര്‍ക്ക് അനുഭവവേദ്യമാവുന്നില്ല. ഈ കുറവുകളെയെല്ലാം ഒരു പരിധിവരെ മറക്കുവാന്‍ പ്രേരണയാവുന്നത് കാര്‍ത്തിക്കും ജെസിയുമായുള്ള സത്യസന്ധമായ സംഭാഷണങ്ങളാണ്. മനസുതുറന്ന് സ്വാഭാവികമായി സംസാരിക്കുന്ന കഥാപാത്രങ്ങളുള്ള സിനിമകള്‍ ഇന്ന് വിരളമാണല്ലോ!

സാങ്കേതികപരമായി ഗൗതം മേനോന്‍ ചിത്രങ്ങള്‍ പൊതുവേ മുന്നിലാണെങ്കിലും ഇവിടെ ആ പതിവും തെറ്റുന്നു. ആവിശ്യത്തിലും അധികമായും ചിലപ്പോളൊക്കെ കുറഞ്ഞുമിരിക്കുന്ന വെളിച്ചവും, അമിതമായുള്ള ഇഫക്ടുകളും, സുഖകരമല്ലാത്ത ചിത്രസംയോജനവും കാഴ്ചയുടെ സുഖം കുറയ്ക്കുന്നു. ഛായാഗ്രാഹകനായ മനോജ് പരമഹംസയും ചിത്രസന്നിവേശം നിര്‍വ്വഹിച്ച അന്തോണിയും തങ്ങളുടെ മേഖലകളില്‍ പിന്നിലായി. രാജീവന്റെ കലാസംവിധാനം, ചമയം എന്നിവയും നളിനി ശ്രീരാം ഒരുക്കിയിരിക്കുന്ന വസ്ത്രാലങ്കാരവും ചിത്രത്തിനുതകുന്നവയാണ്. അധികമില്ലാത്ത സംഘട്ടനങ്ങള്‍ വിശ്വസിനീയമാക്കുവാന്‍ സ്റ്റണ്ട് മാസ്റ്റര്‍ സില്‍‌വയ്ക്ക് കഴിഞ്ഞു. ഫ്ലെക്സി സ്റ്റുവിന്റെ മേല്‍‌നോട്ടത്തിലുള്ള നൃത്തച്ചുവടുകള്‍ക്ക് പുതുമ പറയുവാനില്ലെങ്കിലും അവ ഗാനങ്ങളോട് ചേര്‍ന്നു പോവുന്നു.

“ഒരുനാള്‍ സിരിത്തേന്‍, മറുനാള്‍ വെറുപ്പേന്‍, ഉനൈനാന്‍ കൊല്ലാമല്‍ കൊന്‍ണ്ട്രുപുതയ്തേനേയ്, മന്നിപ്പായാ?” ചിത്രത്തിന്റെ സത്തമുഴുവന്‍ വരികളിലൊരുക്കിയ താമരയുടെ കവിതകള്‍, ഭാവമൊപ്പിയുള്ള എ.ആര്‍. റഹ്മാന്റെ സംഗീതം; ചിത്രത്തിലെ ഗാനങ്ങള്‍ മികവോടെ വേറിട്ടു നില്‍ക്കുന്നു. എ.ആര്‍. റഹ്മാന്‍, ശ്രെയ ഗോശാല്‍ എന്നിവര്‍ ചേര്‍ന്നാലപിച്ചിരിക്കുന്ന “മന്നിപ്പായാ?” എന്ന ഗാനം തന്നെയാണ് കൂട്ടത്തില്‍ മികവു പുലര്‍ത്തുന്നത്. വിജയ് പ്രകാശ്, സൂസേന്‍, ബ്ലേസ് എന്നിവരുടെ ശബ്ദത്തിലുള്ള “ഹോസന...” എന്ന ഗാനവും ശ്രദ്ധേയമാണ്. കൈതപ്രം എഴുതി ആല്‍ഫോണ്‍സ് ആലപിച്ച “ആരോമലേ!” എന്നൊരു ഗാനവും ചിത്രത്തിലുണ്ട്. ക്ഷണിക്കപ്പെടാത്ത അതിഥിയെപ്പോലെ അനവസരത്തിലാണ് പല ഗാനങ്ങളും ചിത്രത്തില്‍ ചേര്‍ത്തിരിക്കുന്നത് എന്നതിനാല്‍ സിനിമ കാണുമ്പോള്‍ ഇവയൊക്കെ എത്രത്തോളം ആസ്വാദ്യകരമായി അനുഭവപ്പെടുമെന്നു മാത്രം ഗാനങ്ങളെക്കുറിച്ച് സംശയിക്കേണ്ടതുണ്ട്.

താരപരിവേഷമില്ലാതെ സാധാരണക്കാരനായൊരു യുവാവായെത്തുന്ന സിമ്പുവും, പുറം മോടികളുടെ ആര്‍ഭാടങ്ങളൊഴിവാക്കി പരിചിതയായൊരു യുവതിയായി തൃഷയും; ജീവിതത്തോട് അടുത്തു നില്‍ക്കുന്ന ഈ കഥാപാത്രങ്ങളാണ് ചിത്രത്തിന്റെ ജീവന്‍. അവരുടെ ചിന്തകളും സംസാരവും ചിത്രത്തി്നു രൂപമാവുകയും ചെയ്യുന്നു. പറഞ്ഞുപഴകിയ ആണ്‍-പെണ്‍ പ്രണയകഥയെന്ന് സംവിധായകന്‍ ചിത്രത്തിന്റെ റിലീസ് ദിനം പറഞ്ഞുവെങ്കിലും, സാധാരണ കാണുന്നതില്‍ നിന്നും വേറിട്ട് പ്രണയത്തെയും ജീവിതത്തെയും യാഥാര്‍ത്ഥ്യബോധത്തോടെ ചിത്രീകരിക്കുവാന്‍ സിനിമയില്‍ ശ്രമമുണ്ട്. സിനിമയും ജീവിതവും രണ്ടാണെന്ന ധാരണ ശരിവെച്ചാണ് ചിത്രം അവസാനിക്കുന്നതും. പോരായ്മകളുണ്ടെങ്കിലും, ചിത്രമവസാനിക്കുമ്പോള്‍ അവയൊന്നും പ്രേക്ഷകരെ ഏറെ അലോസരപ്പെടുത്തുകയില്ല. അതിനാല്‍ തന്നെ ഹിറ്റ് ചാര്‍ട്ടുകളില്‍ മുന്നില്‍ തന്നെ ‘വിണ്ണൈത്താണ്ടി വരുവായാ’ എത്തുമെന്നു കരുതാം.
--