പോക്കിരി രാജ (Pokkiri Raja)

മമ്മൂട്ടിയേയും പൃഥ്വിരാജിനെയും നായകരാക്കി നവാഗതനായ വൈശാഖ് സംവിധാനം ചെയ്തിരിക്കുന്ന ചിത്രമാണ് ‘പോക്കിരി രാജ’. ഇവരിരുവരോടുമൊപ്പം തെന്നിന്ത്യന്‍ നടി ശ്രിയ ശരണ്‍ കൂടി ചേരുമ്പോള്‍ താരപ്പൊലിമയില്‍ ഈ ചിത്രം ഏറെ മുന്നിലാണ്. മുളകുപാടം ഫിലിംസിന്റെ ബാനറില്‍ ടോമിച്ചന്‍ മുളകുപാടമാണ് ഈ ചിത്രം നിര്‍മ്മിച്ചിരിക്കുന്നത്. സിബി കെ. തോമസ് - ഉദയ്‌കൃഷ്ണ ദ്വയമാണ് ചിത്രത്തിന്റെ കഥ, തിരക്കഥ, സംഭാഷണം എന്നിവയുടെ രചന നിര്‍വ്വഹിച്ചിരിക്കുന്നത്. പറഞ്ഞു പഴകിയ കഥയും സന്ദര്‍ഭങ്ങളും കഥാപാത്രങ്ങളെന്നുമൊക്കെ പറയുന്ന പറച്ചിലു തന്നെ പഴഞ്ചനായി; എന്നാലിതല്ലാതെ ഈ ചിത്രത്തെക്കുറിച്ച് മറ്റൊന്നും പറയുവാനുമില്ല!

ആകെത്തുക     : 3.25 / 10

കഥയും കഥാപാത്രങ്ങളും
സംവിധാനം
അഭിനയം
സാങ്കേതികം
പാട്ട് / നൃത്തം / ആക്ഷന്‍

: 1.00 / 10
: 3.50 / 10
: 4.50 / 10
: 2.50 / 05
: 1.50 / 05

‘ട്വന്റി 20’, ‘പട്ടണത്തില്‍ ഭൂതം’ തുടങ്ങിയ മുന്‍‌ചിത്രങ്ങളില്‍ ഏതെങ്കിലുമൊക്കെ കണ്ടിട്ടുള്ളവര്‍ക്ക് സിബിയും ഉദയ്‌കൃഷ്ണയും കൂടി ഒരുമിച്ചു മുക്കിയാല്‍ എത്രത്തോളം പോവുമെന്ന്‍ ഊഹിക്കാവുന്നതേയുള്ളൂ. ‘എന്നെ തല്ലണ്ടമ്മാവാ, ഞാന്‍ നന്നാവൂല്ല...’ എന്ന ലൈനില്‍ നിന്നും ഒരിഞ്ചു മാറുവാന്‍ തങ്ങളില്ലെന്ന്‍ ആവര്‍ത്തിച്ചു വ്യക്തമാക്കുന്നു ഇവരിരുവരും ‘പോക്കിരി രാജ’യില്‍. മമ്മൂട്ടി മമ്മൂട്ടിയായും പ്രിഥിരാജ് പ്രിഥ്വിരാജായും ഡയലോഗ് പറഞ്ഞു കളിക്കുകയാണ് സിനിമയിലുടനീളം. ‘അണ്ണന്‍ തോറ്റാല്‍ ഞങ്ങള്‍ ഫാന്‍സിനു സഹിക്കൂല്ല...’ എന്നൊക്കെ സംഭാ‍ഷണങ്ങള്‍ മാറുന്നിടത്ത് സിനിമ എന്ന മാധ്യമത്തെ തന്നെ പുതുതായി നിര്‍വ്വചിക്കുകയാണ് രചയിതാക്കളിരുവരും ചേര്‍ന്ന്.

Cast & Crew
Pokkiri Raja

Directed by
Vysakh

Produced by
Tomichan Mulakupadam

Story, Screenplay, Dialogues
Sibi K. Thomas, Udayakrishna

Starring
Mammootty, Prithviraj, Shriya Saran, Nedumudi Venu, Vijayaraghavan, Siddique, Riyaz Khan, Salim Kumar, Suraj Venjaramood, Kalasala Babu, Risabava, Thesni Khan, Bindu Panicker, Baburaj, Delhi Ganesh, Santhosh, Santhosh Yogi

Cinematography (Camera) by
Shaji

Editing by
Mahesh Narayanan

Art Direction by
Saloo K. George

Background Score by
Rajamani

Effects by
Murukesh

Music by
Jassie Gift

Lyrics by
Kaithapram Damodaran Namboothiri

Make-Up by
Shankar

Costumes by
S.B. Satheesan

Choreography by
Shobin Paulraj

Action (Stunts / Thrills) by
Kanal Kannan, Mafia Sasi

Banner
Mulakupadam Films

രാജയായി മമ്മൂട്ടിയും സൂര്യയായി പൃഥ്വിരാജും കെട്ടിലും മട്ടിലും തുടക്കത്തില്‍ പുതുമ തോന്നിപ്പിക്കുന്നുണ്ട്. എന്നാല്‍ ആദ്യമുള്ള ഈ രസം തീര്‍ന്നു കഴിഞ്ഞാല്‍ പിന്നെ ഇവരിരുവരുടേയും അഭിനയം വിരസമാണ്. ശ്രിയയുടെ പേരും പടവും ഉപയോഗിക്കുവാനുള്ള പണമേ നിര്‍മ്മാതാവ് നല്‍കിയുള്ളൂ എന്ന് തോന്നുന്നു. അതിനും മാത്രം രംഗങ്ങളേ ശ്രിയയ്ക്ക് ചിത്രത്തിലുള്ളൂ. മകനെ തെറ്റിദ്ധരിക്കുന്ന അച്ഛനും, രഹസ്യം സൂക്ഷിക്കുന്ന മാമനും, ഇഷ്ടമല്ലാത്ത അഭ്യന്തരമന്ത്രിയുടെ മകനെക്കൊണ്ട് മകളെ കെട്ടിക്കാന്‍ നടക്കുന്ന കമ്മീഷണറച്ഛനുമൊക്കെയായി നെടുമുടി വേണു, വിജയരാഘവന്‍, സിദ്ദിഖ് തുടങ്ങിയവരുണ്ട്. അഭ്യന്തരമന്ത്രിയുടെ വഴിതെറ്റിയ സന്തതിയായി റിയാസ് ഖാന്‍, കോമാളി പോലീസായി സുരാജ്, പൈങ്കിളി കഥാകാരനായി സലിം കുമാര്‍ തുടങ്ങിയ സ്ഥിരം റോളുകളില്‍ മറ്റു ചിലര്‍. കലാശാല ബാബു, ബാബുരാജ്, റിസബാവ, ബിന്ദു പണിക്കര്‍, തെസ്നി ഖാന്‍ തുടങ്ങി ചെറുതും വലുതുമായ കഥാപാത്രങ്ങള്‍ അവതരിപ്പിച്ചുകൊണ്ട് താരങ്ങളുടെ ഒരു നീണ്ടനിര തന്നെ ചിത്രത്തില്‍ അങ്ങുമിങ്ങുമായി കാണാം.

ഇരുന്നും കിടന്നും ക്യാമറ അങ്ങുമിങ്ങും ചലിപ്പിച്ചും ഷാജി പകര്‍ത്തിയ ദൃശ്യങ്ങള്‍, മഹേഷ് നാരായണന്‍ മുരുകേഷിന്റെ ഇഫക്ടുകള്‍ സഹിതം കാണുന്നവരുടെ കണ്ണു നോവാന്‍ പാകത്തില്‍ വെട്ടിക്കൂട്ടിയിട്ടുണ്ട്. പതിവു പോലെ ബഹളങ്ങളുമായി രാജാമണി പിന്നണിയിലുണ്ട്. ഇടി തുടങ്ങിയാല്‍ പിന്നെ ഇതിനൊപ്പം കനല്‍ കണ്ണന്റെയും മാഫിയ ശശിയുടേയും വക ട്രപ്പീസ് കളി വേറേയും. ആളില്ലാത്ത ഇന്നോവകളും, ഒരു ഭാവവും മുഖത്തു വരാത്ത ഇടി കൊള്ളുന്നവരും, ഒരിടി പോലും ഇടിക്കാത്ത ഗുണ്ടാ സംഘാംഗങ്ങളും, സംഘട്ടന രംഗങ്ങളുടെ ഒടുക്കത്തെ നീളവും എല്ലാം കൂടിയാവുമ്പോള്‍ സംഘട്ടന രംഗങ്ങള്‍ സഹിക്കുവാന്‍ പ്രയാസമാവുന്നു. സാലു കെ. ജോര്‍ജ്ജിന്റെ കലാസംവിധാനവും എസ്.ബി. സതീശന്റെ വസ്ത്രാലങ്കാരവും ശങ്കറിന്റെ ചമയങ്ങളുമാണ് സാങ്കേതികവിഭാഗത്തില്‍ അല്പമെങ്കിലും മികവു പുലര്‍ത്തുന്നത്.

നൃത്തം ചെയ്യുവാനറിയില്ല എന്നതൊരു കുറ്റമല്ല, കുറവുമല്ല. എന്നാല്‍ അതൊരു അലങ്കാരമായി കൊണ്ടു നടക്കുന്നത് അല്പത്തരമാണ്. നൃത്തസംവിധായകരായ ഷോബിന്‍ പോള്രാജിന് കുറഞ്ഞപക്ഷം ഇതൊന്ന് മമ്മൂട്ടിയെ ഓര്‍മ്മപ്പെടുത്താമായിരുന്നു. പ്രിഥ്വിരാജും ശ്വേത മേനോനും ആടിത്തിമര്‍ക്കുന്ന “മാണിക്യക്കല്ലിന്‍ മുക്കുത്തിച്ചാര്‍ത്തും...” എന്ന ഗാനരംഗത്തിലെ നൃത്തം കൊള്ളാം. ഉത്സവവുമായി ബന്ധപ്പെട്ടുള്ള ഭക്തിസാന്ദ്രമായ ഒരു ഗാനം എന്ന ഉദ്ദേശത്തിലാവാം “... പരാശക്തിയെന്‍ കൂടെയില്ലേ? എന്നഭയമാം ദേവിയല്ലേ?” എന്നൊക്കെ കൈതപ്രം ദാമോദരന്‍ നമ്പൂതിരി എഴുതി വെച്ചത്. എന്നാല്‍ ജാസി ഗിഫ്റ്റിന്റെ സംഗീതത്തില്‍ ജാസിയും മാലതിയും അനന്തുവും പാടി വന്നപ്പോളത് ചില ചന്തപ്പാട്ടിന്റെ മട്ടിലായി. ചിത്രത്തിലെ മറ്റു ഗാനങ്ങളൊക്കെ പ്രേക്ഷകരെ ബുദ്ധിമുട്ടിക്കുക എന്നൊരുദ്ദേശത്തില്‍ മാത്രം ചേര്‍ത്തിരിക്കുന്നവയാണ്. കെ.ജെ. യേശുദാസും സുജാതയും ചേര്‍ന്നു പാടിയ “മണിക്കിനാവിന്‍ കൊതുമ്പുവള്ളം...” എന്ന കേട്ടിരിക്കുവാന്‍ സുഖമുള്ള ഗാനം സി.ഡി.യിലുണ്ടെങ്കിലും സിനിമയില്‍ കണ്ടതുമില്ല.

സംവിധായകന്റെ ആദ്യ ചിത്രമാണെങ്കില്‍ തന്നെയും, സ്ഥിരം ഫോര്‍മുലകള്‍ അതുപോലെ ആവര്‍ത്തിക്കുന്നതില്‍ വൈശാഖ് ഒരു വിട്ടുവീഴ്ചയും വരുത്തിയിട്ടില്ല. അറുപഴഞ്ചന്‍ കഥ കണ്ടുമടുത്ത രീതിയിലൊക്കെ തന്നെയാണ് വൈശാഖ് അവതരിപ്പിച്ചിരിക്കുന്നത്. ഒരുപക്ഷെ, തുടക്കക്കാരനായതിനാല്‍ മറ്റുള്ളവരുടെ ഇഷ്ടങ്ങള്‍ക്കൊപ്പിച്ച് പടമെടുത്തു വന്നപ്പോള്‍ ഇങ്ങിനെയായിപ്പോയതാവാം. അത്യാവശ്യം സിനിമ എന്നാലെന്തെന്ന് ബോധമുള്ള ആരെക്കൊണ്ടെങ്കിലും എഴുതിച്ച ഒരു തിരക്കഥയായിരുന്നെങ്കില്‍ ഇതിലുമൊക്കെ ഭേദപ്പെട്ടൊരു ചിത്രമൊരുക്കുവാന്‍ വൈശാഖിനാവുമായിരുന്നു. ഇതൊരു പാഠമാക്കിയെടുത്ത്, അടുത്ത ചിത്രത്തിലെങ്കിലും അങ്ങിനെയൊരു വിവേകം വൈശാഖ് കാണിക്കുമെന്നു പ്രതീക്ഷിക്കുന്നു. ചുരുക്കത്തില്‍, പോക്കിരിയായ രാജയുടെ ഭാഷ കടമെടുത്തു പറഞ്ഞാല്‍; 'You see, You bore' (നിങ്ങള്‍ കണ്ടു ബോറടിച്ചോളാന്‍!) എന്ന ഒറ്റ വരിയില്‍ ‘പോക്കിരി രാജ’യുടെ വിധി പറയാം.
--