സീനിയര്‍ മാന്‍ഡ്രേക്ക് (Senior Mandrake)

പതിമൂന്ന് വര്‍ഷങ്ങള്‍ക്ക് മുന്‍പ് മലയാളത്തില്‍ പുറത്തിറങ്ങിയ ‘ജൂനിയര്‍ മാന്‍ഡ്രേക്ക്’ എന്ന ചിത്രത്തിന്റെ രണ്ടാം ഭാഗം, സിനിമയെന്ന് വിളിക്കുവാന്‍ കഴിയാത്ത ഒരു സാധനം, അതാണ് ‘സീനിയര്‍ മാന്‍ഡ്രേക്ക്’. ഇതിന്റെ രചന നിര്‍വ്വഹിച്ച് സംവിധാനം ചെയ്യുക എന്ന സാഹസം കാട്ടിയിരിക്കുന്നത് അലി അക്ബര്‍. മമ്മി സെഞ്ച്വറി, ഷെമീര്‍ തുകലില്‍ എന്നീ ഹതഭാഗ്യരാണ് ഇതിനു വേണ്ടി പണമിറക്കിയിരിക്കുന്നത്. ജഗതി ശ്രീകുമാര്‍, ജഗദീഷ്, കല്പന, ചാരുത തുടങ്ങിയവരാണ് ചിത്രത്തില്‍ അഭിനയി(!)ച്ചിരിക്കുന്നത്. എന്തൊക്കെയോ ശക്തികളുള്ള പ്രതിമ, അതു കൈയിലെത്തുന്നവര്‍ക്ക് കഷ്ടകാലം വരുമെന്നാണ് വെപ്പ്. അതുവെച്ചുകൊണ്ടുള്ള കളികളാണ് ഈ ദൃശ്യവൈകൃതത്തിന്റെ ഇതിവൃത്തം. ആ പ്രതിമയ്ക്ക് ശക്തിയുണ്ടെങ്കിലും ഇല്ലെങ്കിലും, ആ തല കാണിക്കുന്ന സിനിമ എന്തായാലും പ്രേക്ഷകര്‍ക്ക് കഷ്ടകാലം കൊണ്ടുവരുമെന്ന് നൂറു ശതമാനം ഉറപ്പ്.

ചിത്രവിശേഷം പോള്‍ 2009 - ഫലങ്ങള്‍

രണ്ടായിരത്തിയൊന്‍പതിലെ മികച്ച സിനിമയേയും സിനിമകളുടെ അരങ്ങിലും അണിയറയിലും മികവുപുലര്‍ത്തിയ കലാകാരന്മാരേയും കണ്ടെത്തുവാനായി ചിത്രവിശേഷം വായനക്കാര്‍ക്കിടയില്‍ നടത്തിയ അഭിപ്രായ വോട്ടെടുപ്പില്‍ എം.ടി. വാസുദേവന്‍ നായരുടെ തിരക്കഥയില്‍ ഹരിഹരന്‍ സംവിധാനം നിര്‍വ്വഹിച്ച ‘കേരളവര്‍മ്മ പഴശ്ശിരാജാ’ [75] ഒന്നാം സ്ഥാനത്തെത്തി. ബ്ലെസ്സി രചന നിര്‍വ്വഹിച്ച് സംവിധാനം ചെയ്ത ‘ഭ്രമരം’ [74] നേരിയ വ്യത്യാസത്തില്‍ രണ്ടാം സ്ഥാനത്തായപ്പോള്‍‍; രഞ്ജിത്തിന്റെ തിരക്കഥയിലും സംവിധാനത്തിലുമുള്ള ‘പാലേരി മാണിക്യം - ഒരു പാതിരാക്കൊലപാതകത്തിന്റെ കഥ’ [69] മൂന്നാമതെത്തി. ചിത്രവിശേഷം വായനക്കാര്‍ ഓരോ ചിത്രത്തിനും നല്‍കിയ വോട്ടുകള്‍ക്കൊപ്പം സംവിധാനം, കഥ/തിരക്കഥ, സാങ്കേതികം എന്നീ വിഭാഗങ്ങളില്‍ ഓരോ ചിത്രത്തിലെയും കലാകാരന്മാര്‍ക്ക് ലഭിച്ച വോട്ടുകളുടെ അടിസ്ഥാനത്തില്‍ ബോണസ് പോയിന്റുകളും നല്‍കിയതിനു ശേഷമാണ് മികച്ച ചിത്രമായി ‘കേരളവര്‍മ്മ പഴശ്ശിരാജാ’യെ തിരഞ്ഞെടുത്തത്. ആകെ 172 പേര്‍ പങ്കെടുത്ത വോട്ടെടുപ്പില്‍ 11 വോട്ടുകള്‍ അസാധുവായി. പോള്‍ ചെയ്തപ്പെട്ട വോട്ടുകളുടെ പൂര്‍ണവിവരങ്ങള്‍ ഇവിടെയും, ഫലങ്ങള്‍ ഇവിടെയും കാണാവുന്നതാണ്.

ആയിരത്തില്‍ ഒരുവന്‍ (Aayirathil Oruvan)

പ്രാദേശിക സിനിമാ സംവിധായകര്‍ അധികം പരീക്ഷണങ്ങള്‍ക്കു മുതിര്‍ന്നു കാണാത്ത ഫാന്റസിയില്‍ അധിഷ്ഠിതമായ വിഷയം പ്രമേയമാക്കുന്ന തമിഴ് ചിത്രമാണ് ശെല്‍‌വരാഘവന്‍ രചന നിര്‍വ്വഹിച്ച് സംവിധാനം ചെയ്തിരിക്കുന്ന ‘ആയിരത്തില്‍ ഒരുവന്‍’. റീമ സെന്‍, ആന്‍ഡ്രേ ജെറമിയ, കാര്‍ത്തി ശിവകുമാര്‍, പാര്‍ത്ഥിപന്‍ തുടങ്ങിയവര്‍ കേന്ദ്ര കഥാപാത്രങ്ങളെ അവതരിപ്പിക്കുന്ന ഈ ചിത്രം 32 കോടി മുടക്കി നിര്‍മ്മിച്ചിരിക്കുന്നത് ആര്‍. രവീന്ദ്രന്‍. ദശകങ്ങള്‍ക്കു മുന്‍പ് പാലായനം ചെയ്ത ചോള രാജവംശത്തിലെ കണ്ണികളെ തേടിയുള്ള പര്യവേഷണങ്ങള്‍ക്കിടയില്‍ ഭൌമഗവേഷകനായ ചന്ദ്രമൌലിയെ കാണാതാവുന്നു. അദ്ദേഹത്തെ തേടിയുള്ള യാത്രയാവട്ടെ പുതുയുഗത്തിലെ ചോള-പാണ്ഡ്യ പോരാട്ടത്തിലാണ് അവസാനിക്കുന്നത്. (കഥ പൂര്‍ണരൂപത്തില്‍ മനസിലാക്കുവാന്‍ വിക്കിയില്‍ Plot എന്ന ഉപവിഭാഗം കാണുക.)

ഹാപ്പി ഹസ്ബന്റ്സ് (Happy Husbands)

'ഇവര്‍ വിവാഹിതരായാല്‍' എന്ന ചിത്രത്തിലൂടെ സംവിധായക രംഗത്തെത്തിയ സജി സുരേന്ദ്രന്റെ രണ്ടാമത് ചിത്രമാണ് ‘ഹാപ്പി ഹസ്‌ബന്റ്സ്’. തന്റെ ആദ്യ ചിത്രത്തിനു രചന നിര്‍വ്വഹിച്ച കൃഷ്ണ പൂജപ്പുരയെ തന്നെയാണ് സംവിധായകന്‍ ഈ ചിത്രത്തിലും രചനയ്ക്കായി ആശ്രയിക്കുന്നത്. ജയറാം, ഭാവന, ജയസൂര്യ, സംവൃത സുനില്‍, ഇന്ദ്രജിത്ത്, റീമ കല്ലിങ്കല്‍, വന്ദന തുടങ്ങിയ ഒരു നീണ്ട താരനിര തന്നെ ഈ ചിത്രത്തില്‍ കേന്ദ്രകഥാപാത്രങ്ങളായെത്തുന്നു. ഗാലക്സി പ്ലസ് ഫിലിംസിന്റെ ബാനറില്‍ മിലന്‍ ജലീലാണ് ചിത്രത്തിന്റെ നിര്‍മ്മാണം നിര്‍വ്വഹിച്ചിരിക്കുന്നത്.

ചിത്രവിശേഷം പോള്‍ 2009 - വോട്ടെടുപ്പ്

ചിത്രവിശേഷം പോള്‍ 2009-ലേക്ക് നാമനിര്‍ദ്ദേശങ്ങള്‍ സമര്‍പ്പിച്ച ഏവര്‍ക്കും നന്ദി. പോള്‍ 2009-ന്റെ രണ്ടാം ഘട്ടം, വോട്ടെടുപ്പ് ഇവിടെ ആരംഭിക്കുന്നു. മികച്ച ചിത്രം, മികച്ച സംവിധായകന്‍, മികച്ച തിരക്കഥാകൃത്ത്, മികച്ച നായകനടന്‍, മികച്ച നായകനടി, മികച്ച സഹനടന്‍, മികച്ച ബാലതാരം, മികച്ച ഛായാഗ്രാഹകന്‍, മികച്ച കലാസംവിധായകന്‍, മികച്ച ചിത്രസംയോജകന്‍, മികച്ച സിനിമാഗാനം, മികച്ച ഗാനരചയിതാവ്, മികച്ച സംഗീതസംവിധായകന്‍, മികച്ച ഗായകന്‍ / ഗായിക എന്നിങ്ങനെ പതിനഞ്ച് വിഭാഗങ്ങളിലേക്കാണ് വോട്ടെടുപ്പ് നടക്കുന്നത്. ഒടുവിലായി നല്‍കിയിരിക്കുന്ന ഫോമില്‍ നിന്നും ഇഷ്ടപ്പെട്ട ചിത്രത്തിന്റെ / വ്യക്തിയുടെ പേര് സെലക്ട് ചെയ്തതിനു ശേഷം Submit ബട്ടണ്‍ അമര്‍ത്തി സമ്മതിദാനം നിര്‍വ്വഹിക്കാവുന്നതാണ്.

ചിത്രവിശേഷം പോള്‍ 2009 - ഫലങ്ങള്‍ ഇവിടെ.

ചിത്രവിശേഷം പോള്‍ 2009 - നാമനിര്‍ദ്ദേശങ്ങള്‍

രണ്ടായിരത്തിയേഴിലും രണ്ടായിരത്തിയെട്ടിലും യഥാക്രമം ‘ഒരേ കടല്‍’, ‘വെറുതേ ഒരു ഭാര്യ’ എന്നീ ചിത്രങ്ങളെ മികച്ച ചിത്രങ്ങളായി ചിത്രവിശേഷം പ്രേക്ഷകര്‍ തിരഞ്ഞെടുക്കുകയുണ്ടായി. രണ്ടായിരത്തിയൊന്‍‌പതിലെ മികച്ച ചിത്രം തിരഞ്ഞെടുക്കുവാനായി കുറച്ചു കൂടി വിശ്വസിനീയമായ രീതിയില്‍ അഭിപ്രായവോട്ടെടുപ്പ് നടത്തണമെന്നാണ് ആഗ്രഹിക്കുന്നത്. ഈ വര്‍ഷം മുതല്‍, മികച്ച ചിത്രത്തിനു പുറമെ ഇതര വിഭാഗങ്ങളേയും അഭിപ്രായവോട്ടെടുപ്പില്‍ ഉള്‍പ്പെടുത്തുന്നുണ്ട്. വോട്ടെടുപ്പിന് മുന്നോടിയായി ഏവര്‍ക്കും അവരുടെ പ്രിയപ്പെട്ട ചിത്രങ്ങളെ / വ്യക്തികളെ നാമനിര്‍ദ്ദേശം ചെയ്യുവാനുള്ള അവസരമാണിവിടെ. രണ്ടായിരത്തിയൊന്‍‌പതില്‍ ഇറങ്ങിയ എല്ലാ ചിത്രങ്ങളും ചിത്രവിശേഷത്തില്‍ ഉള്‍പ്പെടുത്തുവാന്‍ സാധിക്കാത്തതും പല ചിത്രങ്ങളുടേയും റേറ്റിംഗില്‍ പലരും അതൃപ്തി രേഖപ്പെടുത്തിയിട്ടുള്ളതും നാമനിര്‍ദ്ദേശം ഏര്‍പ്പെടുത്തുവാന്‍ കാരണങ്ങളാണ്. ഏവരുടേയും സഹകരണം ഈ അഭിപ്രായവോട്ടെടുപ്പിന് അഭ്യര്‍ത്ഥിക്കുന്നു.

ചിത്രവിശേഷം പോള്‍ 2009 - ഫലങ്ങള്‍ ഇവിടെ.