പ്രമാണി (Pramani)

മോഹന്‍ലാല്‍ നായകനായ ‘മാടമ്പി’ക്കും സുരേഷ് ഗോപി നായകവേഷത്തിലെത്തിയ ‘ഐ.ജി’ക്കും ശേഷം ബി. ഉണ്ണികൃഷ്ണന്‍ രചന നിര്‍വ്വഹിച്ച് സംവിധാനം ചെയ്യുന്ന പുതിയ ചിത്രമാണ് ‘പ്രമാണി’. നായകനായി മമ്മൂട്ടിയും മറ്റു വേഷങ്ങളില്‍ സിദ്ദിഖ്, പ്രഭു, സ്നേഹ തുടങ്ങിയവരുമാണ് ഈ ചിത്രത്തിലുള്ളത്. സൂര്യ ഫിലിംസിന്റെ ബാനറില്‍ ഈ ചിത്രത്തിന്റെ നിര്‍മ്മാണം നിര്‍വ്വഹിച്ചിരിക്കുന്നത് ബി.സി. ജോഷി. പലപ്രാവശ്യം വേവിച്ച പരിപ്പെടുത്ത് വീണ്ടും വേവിച്ച് ‘മാടമ്പി’യാക്കി ഉണ്ണികൃഷ്ണന്‍ വിളമ്പിയപ്പോള്‍ അതിനത്രയ്ക്ക് ദഹനക്കേട് തോന്നിയില്ല. എന്നാലതു തന്നെ വീണ്ടും വെച്ചുവിളമ്പുവാന്‍ ചെറിയ തൊലിക്കട്ടി മതിയാവില്ല. അത്തരമൊരു സാഹസമാണ് ബി. ഉണ്ണികൃഷ്ണന്‍ ‘പ്രമാണി’യിലൂടെ ചെയ്തിരിക്കുന്നത്.

ഇന്‍ ഗോസ്റ്റ് ഹൗസ് ഇന്‍ (In Ghost House Inn)

‘2 ഹരിഹര്‍നഗറി’ലൂടെ ബോക്സ് ഓഫീസില്‍ നേടിയ വമ്പന്‍ വിജയത്തിനു ശേഷം സംവിധായകന്‍ ലാല്‍, തോമസുകുട്ടിയുടേയും കൂട്ടുകാരുടേയും മറ്റൊരു കഥ പറയുകയാണ് ‘ഇന്‍ ഗോസ്റ്റ് ഹൗസ് ഇന്‍’ എന്ന പുതിയ ചിത്രത്തിലൂടെ. ലാല്‍ ക്രിയേഷന്‍സും പി.എന്‍.വി. ഫിലിംസും ഒരുമിച്ചൊരുക്കുന്ന ചിത്രം പി.എന്‍. വേണുഗോപാല്‍ നിര്‍മ്മിച്ചിരിക്കുന്നു. മുകേഷ്, സിദ്ദിഖ്, ജഗദീഷ്, അശോകന്‍ എന്നിവരവതരിപ്പിക്കുന്ന നാല്‍‌വര്‍ സംഘത്തിനൊപ്പം നെടുമുടി വേണു, രാധിക തുടങ്ങിയവരും പ്രധാനവേഷങ്ങളിലെത്തുന്നു. ചിരിയോടൊപ്പം അല്പം പേടിയും ഉദ്വേഗവുമൊക്കെ ചേര്‍ത്താണ് പ്രേതമന്ദിരത്തില്‍ അവധിക്കാലം ചെലവിഴിക്കുവാനെത്തുന്ന നാല്‍‌വരുടെ പുതിയ കഥ മെനഞ്ഞിരിക്കുന്നത്.

നായകന്‍ (Nayakan)

നവാഗതനായ ലിജോ ജോസ് പെല്ലിശ്ശേരി ഇന്ദ്രജിത്തിനെ നായകനാക്കി ഒരുക്കിയിരിക്കുന്ന ചിത്രമാണ് ‘നായകന്‍’. തിലകന്‍, സിദ്ദിഖ് തുടങ്ങിയവരാണ് മറ്റ് പ്രധാന വേഷങ്ങളിലെത്തുന്നത്. അനൂപ് ജോണ്‍സണ്‍ കാരേടന്‍ മുതല്‍ മുടക്കിയിരിക്കുന്ന ഈ ചിത്രത്തിനു വേണ്ടി പി.എസ്. റഫീഖ് രചന നിര്‍വ്വഹിച്ചിരിക്കുന്നു. പകയുടേയും പ്രതികാരത്തിന്റെയും കഥ പറയുന്ന ഈ ചിത്രം കൈതക്കാട്ട് വിഷ്വല്‍ മീഡിയയാണ് പ്രദര്‍ശനത്തിനായി എത്തിച്ചിരിക്കുന്നത്. പലവട്ടം നാം കണ്ടിട്ടുള്ള പ്രതികാരസിനിമകളുടെ സ്ഥിരം വഴികളിലൂടെ തന്നെയാണ് ഈ ചിത്രത്തിന്റെയും സഞ്ചാരം, കെട്ടിലും മട്ടിലും അല്പം പുതുമകള്‍ കാണാമെന്നു മാത്രം.

താന്തോന്നി (Thanthonni)

‘വര്‍ഗ്ഗം’, ‘വാസ്തവം’, ‘കാക്കി’ എന്നീ ചിത്രങ്ങളിലെന്നപോലെ തലതെറിച്ച നായകനായി പൃഥ്വിരാജ് വീണ്ടും വേഷമിടുകയാണ് ജോര്‍ജ്ജ് വര്‍ഗീസിന്റെ ആദ്യ സംവിധാന സംരംഭമായ ‘താന്തോന്നി’യില്‍. ‘രാജമാണിക്യം’, ‘ബാലേട്ടന്‍’, ‘കാക്കി’ തുടങ്ങിയ ചിത്രങ്ങളുടെ രചയിതാവ് ടി.എ. ഷാഹിദിന്റെയാണ് കഥയും തിരക്കഥയും സംഭാഷണങ്ങളും. ‘മായാബസാറി’ലൂടെ മലയാളത്തിലെത്തിയ ഷീല കൌറാണ് ചിത്രത്തില്‍ നായികയായെത്തുന്നത്. സായികുമാര്‍, അംബിക, ക്യാപ്റ്റന്‍ രാജു തുടങ്ങിയവരാണ് മറ്റ് പ്രധാനവേഷങ്ങളില്‍. മരിക്കാര്‍ ഫിലിംസിന്റെ ബാനറില്‍ ഷാഹുല്‍ ഹമീദ് മരിക്കാര്‍ ചിത്രം നിര്‍മ്മിച്ചിരിക്കുന്നു. മലയാളത്തില്‍ ഇറങ്ങാറുള്ള കഥയില്ലാത്ത ആക്ഷന്‍ ചിത്രങ്ങളിലേക്ക് ഒന്നുകൂടി, അതാണ് ‘താന്തോന്നി’ക്കു ചേരുന്ന ചുരുക്കെഴുത്ത്.

വിണ്ണൈത്താണ്ടി വരുവായാ (Vinnaithaandi Varuvaayaa)

രണ്ടായിരത്തിയെട്ടില മികച്ച തമിഴ് ചിത്രത്തിനുള്ള കേന്ദ്രസര്‍ക്കാരിന്റെ ബഹുമതി കരസ്ഥമാക്കുകയും, ഒപ്പം തന്നെ വാണിജ്യപരമായി വിജയം കൊയ്യുകയും ചെയ്ത ‘വാരണം ആയിരം’ എന്ന ചിത്രത്തിനു ശേഷം ഗൗതം വാസുദേവ് മേനോന്റെ സംവിധാനത്തില്‍ പുറത്തിറങ്ങുന്ന ചിത്രമാണ് ‘വിണ്ണൈത്താണ്ടി വരുവായാ’. സംവിധായകന്‍ തന്നെ ചിത്രത്തിന്റെ രചനയും നിര്‍വ്വഹിച്ചിരിക്കുന്നു. സിലമ്പരശനും തൃഷ കൃഷ്ണനുമാണ് ചിത്രത്തിലെ കേന്ദ്ര കഥാപാത്രങ്ങളായ കാര്‍ത്തിക്കിനേയും ജെസിയേയും അവതരിപ്പിക്കുന്നത്. മദന്‍, ഗണേഷ്, എല്‍‌റെഡ് കുമാര്‍, ജയരാമന്‍ എന്നിവര്‍ ചേര്‍ന്നു നിര്‍മ്മിച്ചിരിക്കുന്ന ചിത്രം റെഡ് ജയന്റ് മൂവീസ് പ്രദര്‍ശനത്തിനെത്തിച്ചിരിക്കുന്നു. ജനപ്രിയ ചേരുവകള്‍ ഒഴിവാക്കാതെ, കലാമൂല്യമുള്ള വാണിജ്യചിത്രങ്ങളൊരുക്കുന്ന ഗൗതം മേനോന്‍ ശൈലിയില്‍ തന്നെയാണ് ഈ പ്രണയചിത്രവും.