മമ്മി & മി (Mummy and Me)

‘ഡിറ്റക്ടീവി’നു ശേഷം ജീത്തു ജോസഫ് രചനയും സംവിധാനവും നിര്‍വ്വഹിച്ചിരിക്കുന്ന ചിത്രമാണ് ‘മമ്മി & മി’. ഉര്‍വ്വശിയും അര്‍ച്ചന കവിയുമാണ് കേന്ദ്ര കഥാപാത്രങ്ങളായ അമ്മയേയും മകളേയും അവതരിപ്പിക്കുന്നത്. മുകേഷ്, കുഞ്ചാക്കോ ബോബന്‍, ലാലു അലക്സ് തുടങ്ങിയവരാണ് മറ്റ് പ്രധാന വേഷങ്ങളില്‍. ജിതിന്‍ ആര്‍ട്ട്സിന്റെ ബാനറില്‍ ജോയ് തോമസ് ശക്തികുളങ്ങര ഈ ചിത്രം നിര്‍മ്മിച്ചിരിക്കുന്നു. ടീനേജ് പ്രായത്തിലുള്ള മകള്‍, മകളുടെ വളര്‍ച്ചയോട് പൊരുത്തപ്പെടുവാനാവാതെ ആധി പിടിച്ചു നടക്കുന്ന അമ്മ, ഇവര്‍ക്കിടയില്‍ പെട്ടുഴലുന്ന അച്ഛന്‍; ഇങ്ങിനെയൊരു കുടുംബത്തിന്റെ കഥയാണ് ‘മമ്മി & മി’ക്ക് പറയുവാനുള്ളത്.

പോക്കിരി രാജ (Pokkiri Raja)

മമ്മൂട്ടിയേയും പൃഥ്വിരാജിനെയും നായകരാക്കി നവാഗതനായ വൈശാഖ് സംവിധാനം ചെയ്തിരിക്കുന്ന ചിത്രമാണ് ‘പോക്കിരി രാജ’. ഇവരിരുവരോടുമൊപ്പം തെന്നിന്ത്യന്‍ നടി ശ്രിയ ശരണ്‍ കൂടി ചേരുമ്പോള്‍ താരപ്പൊലിമയില്‍ ഈ ചിത്രം ഏറെ മുന്നിലാണ്. മുളകുപാടം ഫിലിംസിന്റെ ബാനറില്‍ ടോമിച്ചന്‍ മുളകുപാടമാണ് ഈ ചിത്രം നിര്‍മ്മിച്ചിരിക്കുന്നത്. സിബി കെ. തോമസ് - ഉദയ്‌കൃഷ്ണ ദ്വയമാണ് ചിത്രത്തിന്റെ കഥ, തിരക്കഥ, സംഭാഷണം എന്നിവയുടെ രചന നിര്‍വ്വഹിച്ചിരിക്കുന്നത്. പറഞ്ഞു പഴകിയ കഥയും സന്ദര്‍ഭങ്ങളും കഥാപാത്രങ്ങളെന്നുമൊക്കെ പറയുന്ന പറച്ചിലു തന്നെ പഴഞ്ചനായി; എന്നാലിതല്ലാതെ ഈ ചിത്രത്തെക്കുറിച്ച് മറ്റൊന്നും പറയുവാനുമില്ല!

കഥ തുടരുന്നു... (Kadha Thudarunnu)

‘ഭാഗ്യദേവത’യ്ക്കു ശേഷം ജയറാമിനെ നായകനാക്കി സത്യന്‍ അന്തിക്കാട് ഒരുക്കിയിരിക്കുന്ന പുതിയ ചിത്രമാണ് ‘കഥ തുടരുന്നു’. ആസിഫ് അലിയും മം‌മ്തയുമാണ് മറ്റ് പ്രധാന വേഷങ്ങളില്‍. സംവിധാനത്തിനൊപ്പം ചിത്രത്തിന്റെ രചനയും സത്യന്‍ അന്തിക്കാടിന്റെ തന്നെ. ട്രൂലൈന്‍ സിനിമയുടെ ബാനറില്‍ തങ്കച്ചന്‍ ഇമ്മാനുവേലാണ് ചിത്രം നിര്‍മ്മിച്ചിരിക്കുന്നത്. കുടുംബപ്രേക്ഷകരെ മുന്‍‌നിര്‍ത്തി, അടുത്തിടയായി സത്യന്‍ അന്തിക്കാട് പിന്തുടരുന്ന പതിവ് ചേരുവയില്‍ തന്നെയാണ് ഈ ചിത്രവും തയ്യാറാക്കിയിരിക്കുന്നത്.

സുറ (Sura)

ഇളയദളപതി വിജയ്‌യുടെ അന്‍പതാമത് ചിത്രമാണ് എസ്.പി. രാജ്കുമാര്‍ സംവിധാനം നിര്‍വ്വഹിച്ച ‘സുറ’. തമന്ന, ദേവ് ഗില്‍, വടിവേലു തുടങ്ങിയവരാണ് മറ്റ് അഭിനേതാക്കള്‍. സംവിധായകന്റെ തന്നെയാണ് കഥയും തിരക്കഥയും സംഭാഷണങ്ങളും. സണ്‍ പിക്ചേഴ്സിന്റെ ബാനറില്‍ സങ്ഗിലി മുരുഗനാണ് ചിത്രത്തിന്റെ നിര്‍മ്മാണം നിര്‍വ്വഹിച്ചിരിക്കുന്നത്. വാണിജ്യപരമായും വിജയിക്കുന്ന കലാമേന്മയുള്ള ഒരുപിടി ചിത്രങ്ങള്‍ പുറത്തിറങ്ങുന്ന സമകാലീന തമിഴ് സിനിമയ്ക്ക് കണ്ണുവീഴാതിരിക്കുവാന്‍ മാത്രമേ വിജയ്‌യുടെ അടുത്തിറങ്ങിയ പടങ്ങളൊക്കെയും ഗുണപ്പെടുന്നുള്ളൂ. ‘സുറ’യുടെ തലയിലെഴുത്തും വ്യത്യസ്തമല്ല.