ഡോണ്‍ 2 (Review: Don 2)

ഡോണ്‍ 2: തിരിച്ചുവരവിലും ഡോണിനു പിഴയ്‍ക്കുന്നില്ല!

ഹരീ, ചിത്രവിശേഷം

രണ്ടായിരത്തിയാറില്‍ പുറത്തിറങ്ങിയ 'ഡോണ്‍: ദി ചേസ് ബിഗിന്‍സ് എഗൈന്‍' പറഞ്ഞു നിര്‍ത്തിയിടത്തു നിന്നും തുടരുന്നു 'ഡോണ്‍ 2: ദി കിംഗ് ഈസ് ബാക്ക്'‍. ആദ്യ ചിത്രം പുറത്തിറങ്ങി അഞ്ചു വര്‍ഷത്തിനു ശേഷമിറങ്ങുന്ന ഈ ചിത്രം അതേ കാലയളവിനു ശേഷമുള്ള ഡോണിനെ അവതരിപ്പിക്കുന്നു. ഫര്‍ഹാന്‍ അക്തര്‍ സംവിധാനം ചെയ്തിരിക്കുന്ന ചിത്രത്തിന്റെ രചനയില്‍ സംവിധായകനോടൊപ്പം അമീത് മേത്ത, അം‍രീഷ് ഷാഹ് എന്നിവരും സഹകരിക്കുന്നു. ഷാരൂഖ് ഖാനോടൊപ്പം ആദ്യ ചിത്രത്തില്‍ പ്രധാന വേഷങ്ങളിലെത്തിയ പ്രിയങ്ക ചോപ്ര, ബോമന്‍ ഇറാനി, ഓം പുരി തുടങ്ങിയവര്‍ ഇതിലുമുണ്ട്. ഇഷ കോപ്പികര്‍, അര്‍ജുന്‍ രാം‍പാല്‍ എന്നിവര്‍ക്കു പകരമായി ഇതില്‍ ലാറ ദത്തയും കുനാല്‍ കപൂറുമാണ്‌ ഡോണിന്റെ സഹായികളായി വേഷമിടുന്നത്. റിലയന്‍സ് എന്റര്‍ടൈന്മെന്റിന്റെയും എക്‍സല്‍ എന്റര്‍ടൈന്മെന്റിന്റെയും ബാനറില്‍ ഫര്‍ഹാന്‍ അക്തര്‍, റിതേഷ് സിദ്‍വാനി, ഷാരൂഖ് ഖാന്‍ എന്നിവരൊരുമിച്ചാണ്‌ ചിത്രത്തിനു വേണ്ടി പണം മുടക്കിയിരിക്കുന്നത്. ഡോണായി ഷാരൂഖ് ഖാനും റോമയായി പ്രിയങ്ക ചോപ്രയും കസറുമ്പോള്‍ മറ്റൊരു ഉദ്വേഗഭരിതമായ വിനോദചിത്രമായി 'ഡോണ്‍ 2' പ്രേക്ഷകരെ തൃപ്തിപ്പെടുത്തുന്നു.

ആകെത്തുക     : 6.00 / 10

കഥയും കഥാപാത്രങ്ങളും
സംവിധാനം
അഭിനയം
സാങ്കേതികം
പാട്ട് / നൃത്തം / ആക്ഷന്‍

: 4.00 / 10
: 7.00 / 10
: 7.00 / 10
: 3.00 / 05
: 3.00 / 05

ചിത്രത്തിന്റെ കഥയ്‍ക്കോ തിരക്കഥയ്‍ക്കോ കാര്യമായ പുതുമയൊന്നും അവകാശപ്പെടുവാനില്ല. സംഭാഷണങ്ങളുടെ മികവിലാണ്‌ പല രംഗങ്ങളും പ്രസക്തമാവുന്നത് തന്നെ. ആവര്‍ത്തന വിരസമായി മാറിപ്പോവുമായിരുന്ന പല രംഗങ്ങളും രക്ഷപെടുന്നത് അവയുടെ അവതരണത്തില്‍ കൊണ്ടുവന്നിരിക്കുന്ന 'ഡോണ്‍ ടച്ചി'ന്റെ മികവൊന്നുകൊണ്ടു മാത്രമാണ്‌. ആ രീതിയില്‍ ചിത്രത്തെ ആസ്വാദ്യകരമാക്കിയതിന്‌ സംവിധായകന്‍ തീര്‍ച്ചയായും അഭിനന്ദനമര്‍ഹിക്കുന്നു. അഭിനേതാക്കളേയും അണിയറപ്രവര്‍ത്തകരേയും ചിത്രത്തിനുതകും വിധം ഉപയോഗിച്ചിരിക്കുന്നതിലും ഫര്‍ഹാന്‍ അക്തറിന്റെ മികവ് പ്രകടമാണ്‌. ഡോണിന്റെ പദ്ധതികള്‍ എല്ലായ്‍പോഴും വിജയം കാണുന്നതിനു പകരമായി, ചിലതൊക്കെ പിഴയ്‍ക്കുകയും അവിടവിടെ പുതിയ തന്ത്രങ്ങള്‍ വരികയും ചെയ്യുന്നൊരു രീതിയായിരുന്നെങ്കില്‍ കൂടുതല്‍ ആകര്‍ഷകമാവുമായിരുന്നു ചിത്രം. ഇതിപ്പോള്‍ പറഞ്ഞുറപ്പിച്ച ചുറ്റിക്കളികളല്ലാതെ, ഡോണിന്റെ സാന്നിധ്യം ചിത്രത്തിലെ പ്ലോട്ടില്‍ അനിവാര്യമാക്കുന്ന ഒന്നും തന്നെ കാണുവാനായില്ല. ആ ഒരു തലത്തിലേക്ക് ഇത്തരം ചിത്രങ്ങളെ ഉയര്‍ത്തുവാന്‍ സാധിക്കുന്നില്ലെങ്കില്‍, വളരെ മികവോടെയുള്ള അവതരണം പോലും ഏറെ ഫലം ചെയ്യുമെന്ന് കരുതുക വയ്യ.

Cast & Crew
Don 2

Directed by
Farhan Akhtar

Produced by
Ritesh Sidhwani, Shahrukh Khan, Farhan Akhtar

Story, Screenplay / Dialogues by
Farhan Akhtar, Ameet Mehta, Amrish Shah / Farhan Akhtar

Starring
Shahrukh Khan, Priyanka Chopra, Boman Irani, Kunal Kapoor, Aly Khan, Om Puri, Nawab Shah, Lara Dutta, Sahil Shroff, Florian Lukas etc.

Cinematography (Camera) by
Jason West

Editing by
Anand Subaya

Production Design (Art) by
T.P. Abid

Sound Design by
Nakul Kamte

Music by
Shankar-Ehsaan-Loy

Lyrics by
Javed Akhtar

Make-Up by
Shabana Latif

Costumes by
Jaimal Odedra

Choreography by
Vaibhavi Merchant

Action (Stunts / Thrills) by
Action Concept

Banner
Reliance Entertainment, Excel Entertainment

സംവിധായകന്റെ മനസറിഞ്ഞുള്ള അഭിനേതാക്കളുടെ പ്രകടനമികവിലാണ്‌ ചിത്രം ഇത്രത്തോളം പൂര്‍ണത നേടുന്നത്. ഡോണ്‍ എന്ന കഥാപാത്രത്തെ തന്റേതായ ശൈലിയില്‍ അനായാസമായി അവതരിപ്പിച്ചു കൊണ്ട് ഷാരൂഖ് ഖാന്‍ മികച്ചു നില്‍ക്കുന്നു. റോമയായി പ്രിയങ്ക ചോപ്രയും മികവിന്റെ കാര്യത്തില്‍ ഷാരൂഖിനൊപ്പം തന്നെയുണ്ട്. ഷാരൂഖും പ്രിയങ്കയും തമ്മിലുള്ള 'കെമിസ്‍ട്രി' ഇരുവരുടേയും കഥാപാത്രങ്ങളുടെ വിജയത്തിനും കാരണമായി. മറ്റുള്ള പ്രസക്തമായ വേഷങ്ങളില്‍ ബോമന്‍ ഇറാനി, അലി ഖാന്‍, നവാബ് ഷാ തുടങ്ങിയവരും മികവു പുലര്‍ത്തുന്നു. ഓം പുരി, ലാറ ദത്ത തുടങ്ങിയവരുടെ കഥാപാത്രങ്ങള്‍ക്ക് കാര്യമായ പ്രാധാന്യം ചിത്രത്തില്‍ വരുന്നില്ല. കമ്പ്യൂട്ടര്‍ ഹാക്കര്‍ സമീറായെത്തിയ കുനാല്‍ കപൂറിന്‌, ഒട്ടേറെ സിനിമകളില്‍ ഇതിനോടകം നാം കണ്ടു കഴിഞ്ഞ ഹാക്കറുടെ അതേ രൂപഭാവങ്ങള്‍ മാത്രമേ നല്‍കുവാന്‍ കഴിയുന്നുള്ളൂ. റോമയുടെ കാമുകന്‍ അര്‍ജ്ജുനായെത്തിയ സഹില്‍ ഷറോഫ് മാത്രമാണ്‌ അഭിനേതാക്കളില്‍ പിന്നിലായത്. ഒരുപക്ഷെ, ആ കഥാപാത്രത്തിലേക്ക് അഭിനേതാവിനെ തിരഞ്ഞെടുത്തതില്‍ തന്നെ പാളിച്ച പറ്റിയെന്നു കരുതുകയാവും ഉചിതം. അതിഥി താരമായി ഹൃത്വിക് റോഷന്‍ ഇടയ്‍ക്കൊരു ഭാഗത്ത് ചിത്രത്തിലെത്തുന്നെങ്കിലും, ഉദ്ദേശിച്ചൊരു സുശക്തഫലം ഹൃത്വിക്കിന്റെ സാന്നിധ്യത്തിലൂടെ ചിത്രത്തിനുണ്ടായെന്നു കരുതുകവയ്യ.

ചിത്രത്തെ 'സ്റ്റൈലിഷാ'യി അവതരിപ്പിക്കുന്നതില്‍ ചിത്രത്തിന്റെ പിന്നണിയില്‍ പ്രവര്‍ത്തിച്ച സാങ്കേതിക വിദഗ്ദ്ധര്‍ വിജയം കണ്ടു. ജേസണ്‍ വെസ്റ്റിന്റെ ഛായാഗ്രഹണം, ആനന്ദ് സുബയ്യയുടെ ചിത്രസന്നിവേശം, ടി.പി. അബിദിന്റെ കലാസംവിധാനം തുടങ്ങിയവയൊക്കെ പരസ്പര പൂരകങ്ങളായി വര്‍ത്തിച്ചിട്ടുണ്ട്. ശങ്കര്‍ - ഇഹ്‍സാന്‍ - ലോയി കൂട്ടുകെട്ടിലുള്ള പശ്ചാത്തലസംഗീതം ദൃശ്യങ്ങളെ, അവയുടെ ഭാവതലത്തില്‍ പൂര്‍ണതയിലെത്തിക്കുന്നു. ചമയം, വസ്‍ത്രാലങ്കാരം എന്നിവയില്‍ യഥാക്രമം ഷബാന ലത്തീഫ്, ജൈമല്‍ ഒഡേഡ്ര എന്നിവരും മികവു പുലര്‍ത്തുന്നു. ഒരു 3D ചിത്രമെന്ന നിലയില്‍ നോക്കിയാല്‍ കാര്യമായ സാങ്കേതികമികവൊന്നും ചിത്രത്തിനു പറയുവാനില്ല. ചുരുക്കം ചില ഇഫക്‍ടുകളിലും ചില ഗിമ്മിക്കുകളിലും മാത്രമായി 3D-യുടെ ഉപയോഗം ചുരുങ്ങുന്നു. 3D-യുടെ യഥാര്‍ത്ഥ സാധ്യതകള്‍ ഉപയോഗിക്കുവാന്‍ ഇനിയും ബോളിവുഡ് പഠിക്കേണ്ടിയിരിക്കുന്നു. ചിത്രത്തിന്റെ അവസാനഭാഗങ്ങള്‍ നടക്കുന്ന ഉള്ളറകളില്‍ 3D ഒരു പ്രത്യേക അനുഭവം തന്നെ നല്‍കേണ്ടിയിരുന്നു. പക്ഷെ, 2D‍-യില്‍ ലഭിക്കുമായിരുന്നതിന്‌ ഉപരിയായി എന്തെങ്കിലും അവിടെയും നല്‍കുവാന്‍ ചിത്രത്തിലെ 3D-യ്ക്ക് കഴിയുന്നില്ല എന്നതാണ്‌ വാസ്‍തവം.

മികച്ച നൃത്തസംവിധാനവും, ഒന്നിനൊന്ന് വ്യത്യസ്‍തമായ ഗാനങ്ങളും 'ഡോണ്‍' ആദ്യ പതിപ്പിനു മിഴിവേകിയെങ്കില്‍ രണ്ടാം പതിപ്പിലെത്തുമ്പോള്‍ ഗാനങ്ങള്‍ക്ക് കാര്യമായ പ്രാധാന്യം കൈവരുന്നില്ല. ആദ്യചിത്രത്തിലെ "ആജ് കി രാത്..." ഓര്‍മ്മപ്പെടുത്തുന്ന "സര ദില്‍ കോ താം ലോ..." എന്ന ഗാനം മാത്രമാണ്‌ ചിത്രത്തില്‍ പ്രസക്തമായി വരുന്നത്. ജാവേദ് അക്തറിന്റെ വരികള്‍ക്ക് ശങ്കര്‍ - ഇഹ്‍സാന്‍ - ലോയി ഈണമിട്ടിരിക്കുന്നു. വൈഭവി മെര്‍ച്ചന്റ് ഒരുക്കിയിരിക്കുന്ന നൃത്തച്ചുവടുകളും ആദ്യത്തെ പതിപ്പിലെ നൃത്തരംഗങ്ങളെ അപേക്ഷിച്ച് കാര്യമായ മികവിലേക്ക് എത്തുന്നില്ലെന്നു കാണാം. ഒരുപക്ഷെ, മികച്ച ഗാനങ്ങളും അവയുടെ മികവുറ്റ ഗാനരംഗങ്ങളും പ്രതീക്ഷിച്ച് തിയേറ്ററിലെത്തുന്നവരെ ഇത് നിരാശപ്പെടുത്തിയേക്കാം.

ആക്ഷന്‍ രംഗങ്ങളില്‍, സംഘട്ടനങ്ങളുടെ വ്യത്യസ്‍തതയേക്കാള്‍ 'ഡോണ്‍ 2'-ല്‍ പ്രാധാന്യം ലഭിക്കുന്നത് അതിന്റെ ശൈലീകൃതമായ അവതരണത്തിനാണ്‌. ഷാരൂഖ് ഖാന്‍, പ്രിയങ്ക ചോപ്ര എന്നിവരുള്‍പ്പടെയുള്ള ചിത്രത്തിലെ അഭിനേതാക്കളെല്ലാവരും തന്നെ കൈയ്-മെയ് മറന്ന് ഈവക രംഗങ്ങളില്‍ പ്രവര്‍ത്തിച്ചിട്ടുണ്ട് എന്നതാണ്‌ ഈ രംഗങ്ങളുടെ മികവുയര്‍ത്തുന്ന പ്രധാന ഘടകം. ഈ രീതിയിലൊക്കെ ആക്ഷന്‍ രംഗങ്ങള്‍ മികവു പുലര്‍ത്തുന്നുണ്ടെങ്കില്‍ തന്നെയും; 'മെട്രിക്‍സ്', 'മിഷന്‍ ഇം‍പോസിബിള്‍' ഒക്കെ കണ്ടു കഴിഞ്ഞ പ്രേക്ഷകര്‍ക്കു മുന്‍പിലാണ്‌ അവയിലൊക്കെ ഉള്ളതിന്റെയൊരു ചെറുപതിപ്പുമായി 'ഡോണ്‍ 2' എത്തുന്നത് എന്നു കൂടി ഓര്‍ക്കേണ്ടതുണ്ട്. ആഗോളതലത്തിലുള്ള പ്രേക്ഷകരെയാണ്‌ ചിത്രം ഉന്നം വെയ്‍ക്കുന്നത് എന്നതു കൂടി ഇതിനോടൊപ്പം പരിഗണിക്കുമ്പോള്‍‍, ചിത്രത്തിലെ ആക്ഷന്‍ രംഗങ്ങള്‍ എത്രകണ്ട് മതിപ്പുളവാക്കും എന്ന് സംശയമുണ്ട്. ചിത്രത്തിലെ ഒരു പ്രധാന സംഘട്ടന - വെടി‍വെയ്‍പ് രംഗത്തിന്‌ 'മെട്രിക്‍സി'ലെ പ്രശസ്‍തമായ 'ലോബി ഷൂട്ടൗട്ട്' രംഗത്തോട് വളരെയധികം സാദൃശ്യവുമുണ്ട്. ആക്ഷന്‍ കണ്‍സെപ്റ്റ് ടീമിനൊപ്പം, വിവിധ വിദേശ ചിത്രങ്ങള്‍ക്കു വേണ്ടി ആക്ഷന്‍ രംഗങ്ങളൊരുക്കിയ വോള്‍ഫ്ഗാങ്ങ് സ്റ്റെജ്മാനാണ്‌ ചിത്രത്തിന്റെ ആക്ഷന്‍ രംഗങ്ങള്‍ സംവിധാനം ചെയ്തിരിക്കുന്നത്.

ഡോണിന്റെ തുടക്ക ചിത്രം കണ്ടിട്ടുള്ളവര്‍ പ്രതീക്ഷിക്കുന്ന മികവിലേക്ക് എത്തുവാന്‍ 'ഡോണ്‍ 2'-ന്‌ കഴിഞ്ഞിട്ടുണ്ട് എന്നു കരുതാം. ഡോണിന്റെ സാമ്രാജ്യത്തെ സൂചിപ്പിക്കുമാറ്‌ വിവിധ രാജ്യങ്ങളിലായുള്ള ചിത്രീകരണവും ചിത്രത്തെ സവിശേഷമാക്കുന്നു. വിശ്വാസ്യയോഗ്യമായി അവിശ്വസനീയമായ കഥകള്‍ പറയുന്നതില്‍ ഹോളിവുഡിനോളം മികവിലേക്കെത്തുവാന്‍ ബോളിവുഡിന്‌ പലപ്പോഴും കഴിയാറില്ല. ഷാരൂഖ് ഖാന്റെ ഏറെ കൊട്ടിഘോഷിക്കപ്പെട്ട 'റാ.വണ്‍' അതിന്‌ ഏറ്റവും ഒടുവിലായി പറയാവുന്ന ഒരു ഉദാഹരണമാണ്‌. ഈയൊരു മേഖലയിലാണ്‌ 'ഡോണ്‍ 2' കാര്യമായി മുന്നേറിയിരിക്കുന്നതെന്ന് കാണാം. തികച്ചും അയാഥാര്‍ത്ഥ്യമായ ഒട്ടേറെ കാര്യങ്ങള്‍ 'ഡോണ്‍ 2'-ലുണ്ട്. പക്ഷെ, അവയൊക്കെയും വിശ്വസനീയമായി അവതരിപ്പിക്കുന്നതില്‍ ഫര്‍ഹാന്‍ അക്തര്‍ വിജയം കണ്ടു. ഷാരൂഖ് ഖാന്റെയും പ്രിയങ്കയുടെയും അഭിനയത്തോടൊപ്പം, ഫര്‍ഹാന്റെ സംവിധാനമികവു കൂടി ചേര്‍ന്ന് തികച്ചും 'സ്റ്റൈലിഷാ'യ ഒരു ചിത്രമായി ഡോണിന്റെ തിരിച്ചുവരവ് ചിത്രം മാറുന്നു. ഒരു വിനോദചിത്രമെന്ന നിലയില്‍ വിജയം നേടുവാന്‍ 'ഡോണ്‍ 2'-ന്‌ കഴിയുമെന്നു തന്നെ അതിനാല്‍ കരുതാം.

ആലപ്പുഴയിലെ വീരയ്യയില്‍ നിന്നുമാണ്‌ ചിത്രം കണ്ടത്. പരിതാപകരമായ പ്രൊജക്ഷനും ശബ്ദസംവിധാനവും തിയേറ്റര്‍ ചുറ്റുപാടുകളും അസുഖകരമായ സിനിമാനുഭവമാണ്‌ നല്‍കിയതെന്നും പറയാതെവയ്യ. സാങ്കേതികമായി വളരെ മികവു പുലര്‍ത്തുന്ന ഇത്തരം ചിത്രങ്ങള്‍ പ്രദര്‍ശിപ്പിക്കുവാന്‍ നല്‍കുമ്പോള്‍ തിയേറ്ററുകള്‍ തിരഞ്ഞെടുക്കുന്നതിലും വിതരണക്കാര്‍ ശ്രദ്ധ ചെലുത്തേണ്ടതുണ്ട്.