മാസ്‍റ്റേഴ്‍സ് (Review: Masters)

മാസ്‍റ്റേഴ്‍സ്: കൊള്ളാവുന്നൊരു ത്രില്ലര്‍ ചിത്രം!

ഹരീ, ചിത്രവിശേഷം

'ഈ പട്ടണത്തില്‍ ഭൂത'ത്തിനു ശേഷം ഏതാണ്ടൊരു മൂന്നു വര്‍ഷത്തിനു ശേഷം ജോണി ആന്റണിയുടെ സംവിധാനത്തില്‍ പുറത്തിറങ്ങിയ ചിത്രമാണ്‌ 'മാസ്‍റ്റേഴ്‍സ്'. സംവിധായകന്റെ ആദ്യ പൃഥ്വിരാജ് ചിത്രമെന്ന വിശേഷണവും ഈ പോലീസ് ത്രില്ലര്‍ ചിത്രത്തിനുണ്ട്. തമിഴ് നടന്‍ ശശികുമാറിന്റെ സാന്നിധ്യമാണ്‌ ചിത്രത്തിന്റെ മറ്റൊരു പ്രത്യേകത. സിന്‍സിയര്‍ സിനിമയുടെ ബാനറില്‍ ശരത് ചന്ദ്രന്‍ നിര്‍മ്മിച്ചിരിക്കുന്ന ഈ ചിത്രത്തിനു വേണ്ടി ജിനു എബ്രഹാം രചന നിര്‍വ്വഹിച്ചിരിക്കുന്നു. മലയാളത്തിലിറങ്ങിയിട്ടുള്ള സ്ഥിരം പോലീസ് ചിത്രങ്ങളുടെ ശൈലിയില്‍ നിന്നും മാറി നില്‍ക്കുന്നൊരു ചിത്രമായി മാറ്റുവാനാണ്‌ സംവിധായകന്റെയും രചയിതാവിന്റെയും ശ്രമം. അതില്‍ അവര്‍ ഒട്ടൊക്കെ വിജയിച്ചിട്ടുണ്ട് എന്നതു കൊണ്ടു തന്നെ അടുത്ത കാലത്ത് മലയാളത്തിലിറങ്ങിയിട്ടുള്ള ത്രില്ലറുകളില്‍ മികച്ചവയുടെ കൂട്ടത്തിലൊന്നായി 'മാസ്‍റ്റേഴ്‍സി'നേയും ചേര്‍ക്കാം.

ആകെത്തുക     : 6.00 / 10

കഥയും കഥാപാത്രങ്ങളും
സംവിധാനം
അഭിനയം
സാങ്കേതികം
പാട്ട് / നൃത്തം / ആക്ഷന്‍

: 6.00 / 10
: 5.50 / 10
: 6.00 / 10
: 3.50 / 05
: 3.00 / 05

പോലീസും കുറ്റവാളികളും തമ്മിലുള്ള വാക്‍പയറ്റുകളൂം ഗിമ്മിക്കുകളുമാണ്‌ മലയാളത്തിലിറങ്ങിയിട്ടുള്ള ഒട്ടുമിക്ക പോലീസ് ത്രില്ലറുകളുടേയും പൊതുസ്വഭാവം. ഈയൊരു ശൈലിയില്‍ നിന്നും മാറി, പുതുമയുള്ളൊരു കഥ അതിഭാവുകത്വങ്ങളില്ലാതെ പറഞ്ഞിരിക്കുന്നു എന്നയിടത്താണ്‌ ചിത്രത്തിനു പുതുമ വരുന്നത്. ചിത്രത്തിന്റെ രചയിതാവായ ജിനു എബ്രഹാം ഇതിന്‌ തീര്‍ച്ചയായും അഭിനന്ദനമര്‍ഹിക്കുന്നു. തന്റെ സ്ഥിരം പാത വിട്ട് മറ്റൊരു വഴിയിലൂടെയാണ്‌ ജോണി ആന്റണി ചിത്രത്തെ സമീപിച്ചിരിക്കുന്നത്. അവതരണത്തിന്‌ അല്‍പം ഗൗരവം നല്‍കിയുള്ള ആ സമീപനം ചിത്രത്തിന്‌ ഗുണകരമായി. ചിത്രത്തിന്‌ പ്രശ്നങ്ങളില്ല എന്നല്ല; അനാവശ്യമായ ചില സംഘട്ടനങ്ങളും, ആദ്യ പാതിയിലെ പാട്ടും, ഇടയ്‍ക്കുള്ള ഇഴച്ചിലുമൊക്കെ ചിത്രത്തിന്റെ ആസ്വാദ്യത കുറയ്‍ക്കുന്നുണ്ട്. യുക്തിസഹമായി പല അറ്റങ്ങളെ കൂട്ടിമുട്ടിക്കുമ്പോഴും ചിലതൊക്കെ ഉത്തരമില്ലാതെ കിടക്കുന്നു എന്നതും ഒരു പരിമിതിയാണ്‌. ഇതിനെയൊക്കെ ഒരു പരിധിവരെ മറച്ച്, കാണികളെ ചിത്രത്തിന്റെ അവസാനം വരെ ഉദ്വേഗഭരിതരാക്കി തിയേറ്ററിലിരുത്തുന്നതില്‍ സംവിധായകന്‍ മിടുക്കു കാട്ടി എന്നതാണ്‌ ചിത്രത്തിന്റെ വിജയം.

Cast & Crew
Masters

Directed by
Johny Antony

Produced by
B. Sarath Chandran

Story, Screenplay, Dialogues by
Jinu Abraham

Starring
Prithviraj, Sasikumar, Piaa Bajpai, Sandhya, Ananya, Salim Kumar, Saikumar, Shammi Thilakan, Biju Menon, Mithra Kurian, Siddique, Jagathy Sreekumar, Mukesh, Geetha, Vijayaraghavan, Sasi Kalinga, Chembil Ashokan etc.

Cinematography (Camera) by
Madhu Neelakandan

Editing by
Ranjan Abraham

Production Design (Art) by
Manu Jagadh

Music / Background Score by
Gopi Sundar

Lyrics by
Shibu Chakravarthi

Make-Up by
Pattanam Shah

Costumes by
S.B. Satheesan

Action (Stunts / Thrills) by
Dhilip Subbarayan

Banner
Sincere Cinema

ശ്രീരാമകൃഷ്ണന്‍ എന്ന പോലീസ് ഉദ്യോഗസ്ഥനെ പൃഥ്വിരാജ് മോശമാവാതെ അവതരിപ്പിച്ചു. ശശികുമാറിന്റെ മിലന്‍ പോള്‍ അത്രകണ്ട് മികവിലേക്ക് എത്തിയതുമില്ല. ശശികുമാറിന്റെ ഡബ്ബിംഗിലെ പ്രശ്നങ്ങളും ആ കഥാപാത്രത്തെ ബാധിച്ചു. ഇവരുടെ സൗഹൃദത്തെക്കുറിച്ച് പലപ്പോഴും ഇവര്‍ തന്നെ വാചാലരാവുമ്പോളും, ഇവര്‍ക്കിടയില്‍ അങ്ങിനെയൊരു ഗാഢസൗഹൃദമുണ്ടെന്ന് കാണികള്‍ക്ക് അനുഭവവേദ്യമാവില്ല. ചിത്രത്തിന്റെ വിഷയം ഇവരുടെ സൗഹൃദമല്ലാത്തതിനാല്‍ അതത്രമാത്രം ദോഷകരമായി ചിത്രത്തെ ബാധിച്ചില്ലെന്നു മാത്രം. ഇതര കഥാപാത്രങ്ങളായി അഭിനേതാക്കളുടെ ഒരു നീണ്ട നിരതന്നെയുണ്ട് ചിത്രത്തില്‍. മിക്കവര്‍ക്കും ഒന്നോ രണ്ടോ സീനുകളിലധികം അഭിനയിക്കുവാനില്ലെങ്കില്‍ പോലും ഒരാളുടേയും കഥാപാത്രം അനാവശ്യമാണെന്ന് പറയുവാന്‍ കഴിയില്ല. സായി കുമാറിന്റെ കഥാപാത്രം സ്ഥിരം ശൈലിയിലായി. ആ വേഷത്തിനല്‍പം വ്യത്യസ്‍തത നല്‍കുകയോ അല്ലെങ്കില്‍ മറ്റൊരു അഭിനേതാവിനെ പരിഗണിക്കുകയോ ചെയ്തിരുന്നെങ്കില്‍ കൂടുതല്‍ മെച്ചമാവുമായിരുന്നു. പിയ വാജ്‍പേയ്, സന്ധ്യ, അനന്യ, സലിം കുമാര്‍, ഷമ്മി തിലകന്‍, ബിജു മേനോന്‍, മിത്ര കുര്യന്‍, സിദ്ദിഖ് തുടങ്ങിയവരൊക്കെയാണ്‌ ചിത്രത്തില്‍ പ്രധാന വേഷങ്ങളിലെത്തുന്നത്.

മധു നീലകണ്‌ഠന്റെ ക്യാമറ അത്ഭുതമൊന്നും പ്രവര്‍ത്തിക്കുന്നില്ലെങ്കിലും ചിത്രത്തിനാവശ്യമായ ദൃശ്യമികവ് നല്‍കുന്നുണ്ട്. രഞ്ജന്‍ എബ്രഹാമിന്റെ ചിത്രസന്നിവേശത്തില്‍ അവ ഒഴുക്കോടെ ചേരുന്നുമുണ്ട്. ഗോപി സുന്ദറിന്റെ പശ്ചാത്തലസംഗീതത്തിന് രംഗങ്ങളുടെ ഭാവമുയര്‍ത്തുന്നതില്‍ ചെറുതല്ലാത്ത പങ്കുണ്ട്. പട്ടണം ഷായുടെ ചമയവും എസ്.ബി. സതീശന്റെ വസ്‍ത്രാലങ്കാരവുമൊക്കെ കഥയ്ക്കും കഥാപാത്രങ്ങള്‍ക്കുമിണങ്ങുന്നു. സംഘട്ടനങ്ങളില്‍ ചിലതൊക്കെ അനാവശ്യമായിരുന്നെങ്കില്‍ തന്നെയും ദിലീപ് സുബ്ബരായന്‍ വിശ്വസനീയമായി ആ രംഗങ്ങള്‍ ഒരുക്കിയിട്ടുണ്ട്. ഷിബു ചക്രവര്‍ത്തി എഴുതിയ "സുഹൃത്ത് സുഹൃത്ത്..." എന്ന ഗാനം നിശ്ചയമായും ഒഴിവാക്കാവുന്നതായിരുന്നു.

ചിത്രത്തിന്റെ ഇടഭാഗങ്ങളിലുള്ള ഇഴച്ചിലൊക്കെ ഒഴിവാക്കി, ഒരു രണ്ട് മണിക്കൂറിനുള്ളില്‍ നില്‍ക്കുന്ന ഒരു ചിത്രമാക്കി ഇതിനെയൊന്ന് വെട്ടിയൊതുക്കി പരുവപ്പെടുത്തിയിരുന്നെങ്കില്‍ ഇതിലുമേറെ ആസ്വാദ്യകരമാവുമായിരുന്നു ഈ ചിത്രം. ആത്മാര്‍ത്ഥത എന്നത് ബാനറിന്റെ പേരില്‍ മാത്രമല്ല മറിച്ച് ഈ ചിത്രവുമായി സഹകരിച്ച ഏവര്‍ക്കും ചിത്രത്തോട് ഉണ്ടായിരുന്നു എന്നതാണ്‌ 'മാസ്‍റ്റേഴ്‍സി'നെ ഈ മികവിലെത്തിക്കുന്നത്. എന്നാലതിനപ്പുറമൊരു മാസ്‍റ്റേഴ്‍സ് ചിത്രമാക്കി മാറ്റുവാന്‍ അണിയറപ്രവര്‍ത്തകര്‍ക്ക് കഴിഞ്ഞതുമില്ല. സിന്‍സിയര്‍ സിനിമയുടെ ബാനറില്‍ ഇതിലും മികച്ച ചിത്രങ്ങള്‍ നിര്‍മ്മിക്കുവാന്‍ ബി. ശരത് ചന്ദ്രന്‌ ഭാവിയില്‍ കഴിയുമെന്നു കരുതാം. അതിനൊരു തുടക്കമാവട്ടെ ജോണി ആന്റണിയുടെ ഈ കന്നി പൃഥ്വിരാജ് ചിത്രം!